Репортажа на „Луксембург Тајмс“: Осум предлози за тоа што можете да направите на кратко зимско патување во Скопје

Директните летови за Скопје почнуваат на 18 декември. Одбравме осум работи што можат да се направат во главниот град во зима, препорачува колумнистката на „Луксембург Тајмс“, Сарита Рао

За два и пол часа можете да бидете во главниот град на Северна Македонија на празничен или градски одмор за да го избркате зимското сивило. Wizz Air ќе започне со директни летови во понеделник, среда и петок од 18 декември.

Имаме осум предлози за тоа што можете да направите на кратко зимско патување во Скопје. Не заборавајте дека Северна Македонија не користи евро валута, туку македонскиот денар и дека ако го посетите Скопје во декември или јануари, температурите ќе бидат ниски, дури и во минус. Но, има уште многу да се види и направи и внатре и на отворено.

Прво малку историја и географија

Познат како Скупи во римско време, првпат се споменува во 2 век, а до 395 година бил под византиска власт. Во средновековниот период градот на моменти бил под бугарска, а од 1282 година под српска власт. Еден век или нешто подоцна бил освоен од Турците Османлии, кои го преименувале во Ускуб и останал под нивна власт 500 години. Во 1912 година повторно бил припоен од Србија за време на Балканските војни, а по Првата светска војна станал дел од новото кралство Југославија.

Денешната Република Северна Македонија стекна независност на 8 септември 1991 година. Како Луксембург, таа е земја без излез на море и ги дели своите граници со Косово на северозапад, Србија на север, Бугарија на исток, Грција на југ и Албанија на запад.

Архитектура и земјотресот од 1963 година

Голем дел од архитектурата на главниот град беше уништена за време на земјотресот во 1963 година, но сè уште има некои импресивни историски знаменитости. Дом на отоманска архитектура и модернистички експерименти, вклучително и некои бруталистички згради подигнати во минатиот век, тоа е место каде што истокот се среќава со западот во однос на архитектурата.

Сè уште има остатоци од римски аквадукт со 50 сводови, а тврдината на градот била обновувана неколку пати, иако моментално е обновена со својот средновековен изглед. Старата чаршија има неколку прекрасни примери на отоманска архитектура, вклучувајќи џамија од 15 век и саат-кула од 16 век.

Под српско владеење, беа изградени голем број вили како Ристиќевата палата на плоштадот Македонија, а по земјотресот градот беше одново испланиран од архитекти од цела Европа, но и од јапонскиот Кензо Танге. Тоа доведе до уникатна архитектура и редок пример во 20 век.

Осум работи што треба да ги направите во зима

1. Разгледајте го градот пеш

Започнете ја вашата турнеја на плоштадот Македонија во срцето на главниот град, дом на споменикот на Воин на коњ, кој го отсликува Александар Велики. Оттука можете да ја посетите Порта Македонија на улицата 11 Октомври, а потоа да се упатите на прошетка по брегот на реката Вардар, поминувајќи го прекрасниот Камен мост, кој датира од 6 век. Мостот на уметноста е осветлен со украсни светилки, кои ги осветлуваат статуите на мостот ноќе. Во близина се закотвени ресторани со „чамци“ и Археолошкиот музеј.

2. Прославете го православниот Божик

Православните христијани во Северна Македонија го слават Божик од 6-9 јануари. Црквите се украсени пред полноќната богослужба на 6 јануари, со многу свеќи кои ја осветлуваат нивната внатрешност. Конкретно, црквата Свети Пантелејмон во Горно Нерези е посветена на заштитникот на лекарите и била изградена во византиската ера со три апсиди и купола со крстообразно јадро во 1164 година. Нејзиниот позната фреска ги отсликува страдањата на Христос и оплакувањето од Богородица, е опишана како спој на животот и смртта во една слика.

3. Ценкање во Старата чаршија

Ако имате око за пазарување, тогаш упатете се до Старата чаршија за да уживате во некои од најдобрите примери од отоманската архитектура. Тоа е добро место за да купите накит или керамика или да ја пробате локалната храна во многуте кафулиња. Чаршијата била трговски центар под отоманска власт, а во близина има неколку џамии и историски бар наречен Капан Ан, кој датира од 15 век. Мустафа-пашината џамија датира од истиот период, а таму е и саат-кула од 16 век. Можете да ја посетите и Националната галерија, која е сместена во две поранешни турски бањи кои некогаш биле дел од Старата чаршија, а сега се дом на слики од 14 до 20 век.

4. Посетете ја спомен куќата на Мајка Тереза или Градскиот музеј

Дали знаевте дека Мајка Тереза е родена во Скопје? И можете да ја посетите спомен-куќата посветена на неа, која содржи фотографии, реликвии и информации за нејзиниот живот, како и мала прилично необична капела.

Ако сакате да го разберете градот, упатете се кон Музејот на Град Скопје, кој се наоѓа на поранешната железничка станица која беше оштетена во земјотресот во 1963 година. Часовникот на неговата надворешност е заглавен во 5:17, кога земјотресот го погоди градот на 26 јули. Овој музеј е бесплатен и можете да дознаете за земјотресот со јачина од 6,1 степени според Рихтеровата скала кој уништи делови од градот, плус посетете ги одделите за историја на уметност, археологија, етнологија и историја.

Музејот на современа уметност има слики од меѓународни и локални уметници, скулптури и инсталации вклучувајќи ги делата на Пабло Пикасо, Фернанд Легер и Ханс Хартунг. Археолошкиот музеј беше отворен во 2014 година и има илјадници артефакти на три ката кои ја покриваат историјата и културата на регионот од праисторијата до византиското, а потоа и отоманското владеење.

5. Качете се на планината Водно или посетете го кањонот Матка

Ако сакате да бидете на отворено, тогаш облечете се и упатете се кон кањонот Матка, кој е прилично магичен кога е покриен со снег. Возењето со чамец ќе ве одведе покрај карпите исполнети со пештери, покрај замрзнатите водопади и вештачкото езеро Матка. Алтернативно скокнете со жичарницата до Милениумскиот крст на планината Водно за панорамски поглед на градот.

6. Вкусете ја македонска кујна

Под влијание на нејзините освојувачи, македонската кујна најдобро е да се проба во многуте локални ресторани или кафеани, каде што исто така ќе можете да слушнете традиционална народна музика. Пробајте тавче гравче, традиционално јадење подготвено со свеж грав печен во земјена тава. Пастрмалијата е пита од леб соо овална форма со парчиња месо одозгора, додека чомлек е чорба со телешко месо, ситни кромидчиња и лук, зготвена во вино, со моркови, магдонос, печурки, домат и суви црвени пиперки. Пробајте и пинџур или ајвар – намази направени од црвени пиперки, домати, лук, а понекогаш и модар патлиџан.

7. Семејна посета на зоолошката градина или природонаучниот музеј

Зоолошката градина Скопје е на површина од 12 хектари во близина на Градскиот парк и е дом на 500 животни од 85 видови. Во претходните децении добиваше критики за лошите услови, кога слон умре во заробеништво. Сепак, зоолошката  беше обновена во 2010 година со нови живеалишта, кои сега се дом на големи мачки, мајмуни, зебри и папагали, плус дино-парк со неколку големи модели, вклучително и Т-рекс. Ако е премногу студено, наместо тоа, одлучете се за Природно-научниот музеј кој има повеќе од 4.000 предмети распоредени на два ката со фосили, влекачи и водоземци, растенија, птици, риби и инсекти.

8. Забава во баровите и клубовите

Ако сте ноќна птица, има многу места каде што можете да се забавувате цела ноќ. Љубителите на џезот треба да се упатат во Бруклин бистро за музика во живо и да добијат њујоршки амбиент. Шорт бас ги пречекува сите без разлика на нивното потекло, раса, сексуална ориентација или религиозни ставови. Има диџеи, електронска музика и клиентела која е дефинитивно боемска и уметничка. Пробајте ја топлата лимонада со ѓумбир. Љубителите на коктели треба да се упатат кон Спикизи – ретро бар до фонтаната во Градскиот парк, а оние кои сакаат да се забавуваат нека го пробаат ноќниот клуб Епицентар, за да се дружат со познатите Македонци. За најдобар поглед, упатете се надвор од градот во хип хоп Баду Бар и уживајте во панорамата на Шар Планина, Водно и Скопска Црна Гора низ неговите големи прозорци. (Сарита Рао – Луксембург Тајмс / МИА)