Skip to content
Исландските власти вчера соопштија дека се подготвуваат за вулканска ерупција на југозападниот дел на островот во наредните денови по серијата земјотреси и докази за брзо подземно ширење на магма.
Исландската метеоролошка служба соопшти дека постои „значителен“ ризик од ерупција на или во близина на полуостровот Рејкјанес поради големината на навлегувањето на подземната магма и брзината со која таа се движи, пренесува Ројтерс.
„Веројатноста за ерупција е зголемена од утрово и ерупција може да започне во секое време во следните неколку дена“, се вели во соопштението.
Исландската Агенција за цивилна заштита во текот на ноќта нареди целосна евакуација на Гриндавик, рибарски град со околу 3.000 жители.
Регионот Рејкјанес забележа неколку ерупции во ненаселени области во последниве години. Последната се очекува да започне на морското дно веднаш југозападно од Гриндавик, соопшти метеоролошката служба.
Во четвртокот, зголемената сеизмичка активност го поттикна затворањето на геотермалната бања Blue Lagoon, една од главните туристички атракции на Исланд.
Подготви: Марта Пешевска (FronLine)
