Групата на држави против корупција на Советот на Европа (ГРЕКО) оваа година ја слави својата 25-годишнина. Од 1999 година, кога беше основана, ГРЕКО е движечка сила во борбата против корупцијата во нејзините земји-членки, кои денес го вклучуваат 46-те земји-членки на Советот на Европа, Соединетите Американски Држави и Казахстан.
Со текот на годините, ГРЕКО го подобри капацитетот на своите членки за борба против корупцијата преку следење на нивната усогласеност со стандардите за антикорупција и помагајќи им да ги идентификуваат и поправат недостатоците во националните антикорупциски политики. Тоа поттикна законодавни, институционални и практични реформи во области како криминализација на корупциски престапи, транспарентност на политичкото финансирање и спречување на корупцијата меѓу парламентарците, судиите, обвинителите, највисоките извршни функции на централната власт и полицијата.
За да ја одбележи својата 25-годишнина, на 20 јуни, ГРЕКО организираше специјална сесија за време на својот пленарен состанок во Стразбур, со цел да направи преглед на достигнувањата и да ги испита предизвиците што претстојат во спречувањето и борбата против корупцијата.
Претседателот на ГРЕКО, Марин Мрчела, на специјалната сесија истакна дека ГРЕКО „има средства да се осигури дека корупцијата не е прифатена практика на функционирањето на институциите во нашите демократски држави“.
„За 25 години, ГРЕКО се покажа како едно од најефикасните тела што придонесува за постигнување на оваа цел. Нашата сила и кредибилитет лежат во фактот што не се откажуваме кога нашите препораки не се спроведуваат. Горд сум на нашата процедура за усогласување бидејќи таа доведе до конкретни резултати, но ГРЕКО треба да размисли како најдобро да ги реши ситуациите на континуирана неусогласеност и да ги поддржи своите членки да ги постигнат очекуваните резултати”, нагласи Марин Мрчела.
Обраќајќи се на пленарната седница на ГРЕКО, заменик-генералниот секретар Бјорн Берге рече дека „веќе четврт век, извештаите за мониторинг на ГРЕКО одат во суштината на начинот на кој функционираат државите членки“.
„Нивното следење е дефинирано со постојана упорност во потсетувањето на членовите за нивните обврски. Она што останува важно е дека ГРЕКО продолжува да го обезбедува своето високо ниво на контрола и очекувањата на своите членки”, посочи заменик-генералниот секретар Бјорн Берге.
Сиофра О’Лири, претседател на Европскиот суд за човекови права, истакна дека стандардите што ГРЕКО ги има развиено и неговите наоди во проценките на земјите се рефлектираат во многу пресуди на Судот.
„Ова покажува конструктивна и комплементарна интеракција помеѓу работата на вашето тело и автономната судска гранка на Советот на Европа“, рече O’Лири.
Клер Бази Малаури, претседател на Венецијанската комисија; членот на ПССЕ Суна Аеварсдотир, претставник на Парламентарното собрание; Данела Арсовска, градоначалник на Скопје и портпарол за етика и спречување на корупцијата на Конгресот на локални и регионални власти; и Леони Рејнолдс, претседател на Консултативниот совет на европските судии, исто така, зборуваа на седницата.
