Skip to content
Германската полиција почна да ги надгледува сите копнени граници на земјата како дел од напорите за сузбивање на нерегуларната миграција и криминалот по неодамнешните екстремистички напади.
Претходно се проверуваа само патниците кои пристигнуваа на источната и јужната копнена граница на Германија. Сега, а најмалку во следните шест месеци, ќе се надгледуваат и северните и западните граници.
Ова ги вклучува граничните премини со Данска, Холандија, Белгија, Луксембург и Франција.
Германија се наоѓа во центарот на Шенген зоната, која опфаќа 29 европски земји кои ја укинаа контролата на внатрешните граници, а пасошите се потребни само на надворешните граници и на аеродромите.
Во првиот ден од враќањето на контролите на границите, германската полиција уапси тројца мажи кои патуваа со хашиш во багажникот на нивниот автомобил, пренесе Дојче веле.
Портпаролот на полицијата изјави дека тројцата избегнале контролен пункт на автопатот А30 во близина на градот Бад Бенхајм додека од Холандија влегувале во германската покраина Долна Саксонија.
Андреас Роскопф, шефот на германската Федерална полициска унија, изјави за радиодифузерот RBB24 Inforadio дека секој што ја преминува границата со Германија сега треба да очекува да биде проверен.
Тој, сепак, призна дека со оглед на должината на границите на земјата, полицијата реално нема да може да го запре секое возило.
Германија има 1.400 километри на својата западна граница, како дополнение на 2.400 километри долж нејзината источна и јужна граница каде што веќе се вршеа проверките, изјави тој за станицата во понеделникот наутро.
Роскопф соопшти дека со оглед на должината на границата, не се можни постојани и интензивни проверки.
„Останува да се види колку ќе биде успешна во спречувањето на миграцијата и шверцот на луѓе“, рече тој во интервјуто од понеделник наутро.
Германското Министерство за внатрешни работи ја отфрли идејата дека полицијата прибегнува кон расно профилирање во проширените контроли на германските граници – конкретно проверувајќи ги луѓето поради перцепирниот изглед.
Портпаролката на министерството во понеделникот во Берлин истакна дека „расно мотивираното спроведување на полициските мерки би било целосно неприфатливо и исто така незаконско“.
„Расното профилирање е особено одвратна форма на дискриминација што ги стигматизира засегнатите луѓе и може сериозно да ја наруши нивната самодоверба“, продолжи портпаролката.
Таквиот пристап може да доведе до отуѓување во односот со безбедносните органи“ што полицијата сака да го избегне.
„Сакаме луѓето да можат да им веруваат на безбедносните власти“. Полицијата, рече таа, располагала со други критериуми.
Лидерот на германската социјалистичка левичарска партија остро ја критикуваше федералната влада за проширената гранична контрола и миграциската политика воопшто.
„Контролите на границите не решаваат ниту еден проблем, тие создаваат само нови“, рече шефицата на партијата Жанин Вислер.
Мерките ќе доведат до „гигантски сообраќаен метеж“, рече таа, додавајќи дека е предвидливо дека контролите првенствено ќе ги погодат луѓето чиј изглед можеби не се смета за германски.
Вислер предвиде дека мерката ќе предизвика „европска верижна реакција“.
Наскоро, рече таа, „бариерите би можеле повторно да се кренат насекаде“, а десетици илјади бегалци би можеле да бидат заглавени во земји како Италија или Грција.
Вислер рече дека владата на канцеларот Олаф Шолц ја спроведува политиката на екстремно десничарската Алтернатива за Германија (AfD) за миграцијата пред државните избори во Бранденбург во недела.
Откако Германија се обидува да воведе построга контрола на нејзините граници, Рафаел Босонг, експерт за европска миграциска политика во Германскиот институт за меѓународни и безбедносни прашања, изјави за ДВ дека нејзината ефикасност е спорна.
„Мислам дека оперативно е доста спорно дали ваквите селективни контроли… навистина ќе направат голема разлика во однос на намалување на бројот или фаќање криминалци или потенцијално дури и терористи“, рече Босонг.
Според Босонг, пораката што се испраќа со граничните контроли е дека „Германија повеќе не е отворена“.
Сепак, мерките не го намалија притисокот врз германската влада, рече Бослонг.
„Во политичка смисла, притисокот сè уште трае… И во Бранденбург на државните избори, опозицијата сè уште го продолжува своето барање да има порадикална политика на враќање на границите“, рече тој.
Извор: DW
