Skip to content
Русија изложува милиони луѓе ширум светот на ризик од глад и зголемување на цените на храната со тоа што одбива да го продолжи своето учество во Црноморската иницијатива за жито, објави украинската амбасадорка во земјава, Лариса Дир на Твитер.
Дир упати повик до меѓународната заедница да заземе принципиелен став и да се придружи на напорите на Украина за спасување на виталниот извоз на жито во светот.
Предходно, Стејт департментот ја обвини Русија дека ја користи храната како оружје за војна.-
Русија, која еднострано се повлече од Иницијативата за жито во Црното Море, ја претвора храната во оружје за војна, изведува ракетни напади врз центарот за жито во Украина и упатува експлицитни закани против мирните бродови, изјави портпаролот на Стејт департментот на САД, Метју Милер, на брифинг во средата, 19 јули, коментирајќи ги руските ракетни напади врз украинската пристанишна инфраструктура и изјавите на Москва, јави дописникот на Укринформ.
„Русија продолжува да ја користи храната како воено оружје“, рече тој.
Тој истакна дека втор ден по ред Руската Федерација упатува закани против бродови во меѓународни води, откако во вторникот портпаролот на Кремљ упати експлицитни закани за бродовите што превезуваат украинско жито, велејќи дека Русија не може да ја обезбеди нивната безбедност. Вчера слични закани пристигнаа и од Министерството за одбрана на Русија.
„Повторно, втор ден по ред по започнувањето на нападите врз Одеса, која е главното пристаниште за испорака на украинско жито“, додаде Милер.
Во овој поглед, тој рече дека треба да биде јасно на сите во светот во моментов дека Русија ја користи храната како оружје за војна не само против украинскиот народ, туку и против сите луѓе во светот, особено најнеразвиените земји кои зависат од житото од регионот.
На 17 јули, Русија го објави своето повлекување од договорот за извоз на жито од Црното Море, кој беше потпишан на 22 јули 2022 година во Истанбул за 120 дена и беше продолжен неколку пати.
Ноќта на 19 јули, околу 60.000 тони жито беа уништени во пристаништето Чорноморск како резултат на руското гранатирање на пристанишната инфраструктура вклучена во иницијативата за жито, изјави министерот за аграрна политика и храна на Украина, Микола Солски.
Тој истакна дека житото што било уништено од Русите требало да биде натоварено на брод со голема тонажа и испратено низ коридорот за жито.
Украинскиот претседател Володимир Зеленски изјави дека нападот на пристанишниот терминал во Одеса докажува дека Украина не е единствената цел на Русија.
Руското Министерство за одбрана соопшти дека почнувајќи од 20 јули, Русија ќе ги смета за воени цели сите бродови кои се упатуваат кон украинските пристаништа во Црното Море.
Според Солски, ноќниот напад оневозможил значителен дел од инфраструктурата за извоз на жито на пристаништето Чорноморск. Во исто време, според проценките на експертите, ќе биде потребна најмалку една година за целосно обновување на предметите оштетени ноќта на 19 јули.
„Најпогодена беше инфраструктурата за жито на меѓународните и украинските трговци и превозници Kernel, Viterra, CMA CGM Group. Ова е терористички чин не против Украина, туку против целиот свет. Безбедноста на храната повторно е загрозена. Човештвото е заложник на терористичка земја која го уценува целиот свет со глад. Светот мора да реагира остро и во согласност со ситуацијата“, рече министерот.
Шефот на Министерството за земјоделство потсети дека кога Украина не може да извезува храна, населението на најсиромашните земји ќе биде на работ на преживување. Покрај тоа, економијата не само на Украина, туку и на светот ќе страда. Цената на житото ќе расте, а не сите земји ќе можат да си дозволат да купуваат земјоделски производи. Исто така, значително ќе се зголемат и цените на прехранбените производи, вклучително брашното, житариците и месото.
Драган Мишев (CivilMedia)
