Skip to content
Таа е под критики од претставници и дипломати бидејќи не зборуваше за хуманитарните последици од одмаздничките напади на Израел врз Хамас во Газа, во кои животот го загубија најмалку 2.450 Палестинци
Претседателката на Европската комисија, Урсула фон дер Лајен е критикувана бидејќи за време на нејзината посета на Израел директно не ја повикала оваа земја да го почитува меѓународното право во војната во Појасот Газа, пишува Политико.
Фон дер Лајен, германски политичар од десниот центар, во петокот го посети кибуцот Кфар Аз каде минатата недела беа убиени десетици цивили во напад на Хамас. Палестинското милитантно движење уби повеќе од 1.400 Израелци во серија напади низ граничната област.
За време на посетата претседателката на Европската комисија изрази безрезервна поддршка за Израел во име на Европската унија. Сега таа е под критики од претставници и дипломати бидејќи не зборуваше за хуманитарните последици од одмаздничките напади на Израел врз Хамас во Газа, во кои животот го загубија најмалку 2.450 Палестинци.
Дипломат ја прозва Фон дер Лајен
„Таа само рече дека Израел има право да се брани, точка. Тоа не е линија за која се договорија земјите-членки“, рече дипломатот, кој зборуваше за Политико под услов да остане анонимен.
Европските министри за надворешни работи ги осудија нападите на Хамас, но повикаа и на заштита на цивилите и воздржаност, ослободување на заложниците и давање пристап до храна, вода и лекови во Газа, во согласност со меѓународното хуманитарно право.
Зборувајќи во петокот заедно со израелскиот премиер Бенјамин Нетанјаху, Фон дер Лејен кажа дека Израел има право да се брани. Откако го призна страдањето на невините Палестинци, таа додаде: „Знам дека израелскиот одговор ќе ни покаже дека тоа е демократија“.
Фон дер Лајен го посети Израел со претседателката на Европскиот парламент, Роберта Мецола, колешка од политичкиот кампус на народните партии. Во Тел Авив, двете жени мораа да се засолнат поради ракетен напад на Хамас.
Шпанска министерка: ЕУ е лицемерна
Иратксе Гарсија, шефица на групата социјалисти и демократи во Европскиот парламент, изјави за Политико дека и Фон дер Лајен и Мецола со право ја изразиле европската солидарност и апсолутно ги осудуваат терористичките напади на Хамас.
„Но, како главни претставници на Европската унија и нејзините институции, тие имаа обврска да ја претставуваат позицијата на Унијата како целина, вклучително и нејзините земји-членки. Тие не успеаја да го сторат тоа со нивната посета на Израел, покажувајќи неприфатлива пристрасност, “ додаде Шпанецот.
Нејзината сонародничка, шпанската министерка за социјални права, Јоне Белара, ја обвини ЕУ дека ја поддржува израелската окупација на Палестина и ги повика жителите на улиците да протестираат против лицемерието на ЕУ и воените злосторства на Израел против Палестинците.
Белара, членка на левичарскиот Унидас Подемос, малцинскиот коалициски партнер на социјалистите од кој ќе зависи формирањето на новата влада, објави изјава во која повика на истрага против Израел пред Меѓународниот кривичен суд за извршени воени злосторства, на ист начин како што шпанската Влада побара истрага за убиството на шпанската соработничка во војната во Украина и убиствата на Хамас во Израел.
„САД и ЕУ се соработници во воените злосторства извршени од Израел на окупираните палестински територии. Ние во Подемос не сме рамнодушни кон ужасите што палестинскиот народ ги доживува со децении. Израел врши планиран геноцид во Појасот Газа“, изјави Белара за конфликтот што трае од 1948 година.
ЕУ отворено го поддржува Израел
Израелската влада нареди евакуација на повеќе од милион луѓе од северниот дел на Газа. Се верува дека ќе следи копнена инвазија на Појасот, што е критикувано и од меѓународните организации.
Покрај Европската комисија и Европскиот парламент, поддршка за Израел ја покажаа и институциите како Европскиот комитет на региони и градови, кои истакнаа израелски знамиња во Брисел. Кон ова им се придружи Советот на Европа, со кој во Стразбур претседаваше поранешната хрватска министерка за надворешни работи, Марија Пејчиновиќ Буриќ. (ПолитИко/МИА)
