Skip to content
За претстојниот викенд и за деновите од наредната недела ви препорачуваме филм, роман и концертна промоција на музички албум. Гледајте, читајте, слушајте…
Филм: Фестивал на нем и класичен филм
Третото издание на фестивалот на нем и класичен филм ќе се одржи од 29 август до 4 септември во Кинотеката на РС Македонија, а ќе почне со претфестивалска проекција на документарниот филм „Адио Југофилм, адио Југофестивал, адио Југославија… Се гледаме во следната војна“ на култниот хрватски актер и режисер Игор Гало.
Годинава тој ќе биде гостин и пред проекцијата ќе зборува за своето творештво, но и за темата на неговиот филм – историјата на Филмскиот фестивал во Пула.
Официјалното отворање на фестивалот ќе биде на 30 август (среда), со проекција на немиот филм „Калабака: Тајните на непознатата Европа“ од 1928 година што претставува еден вид кинематографски извештај за една експедиција на Балканот.
Германската филмска компанија „Хегевалд“ го испраќа патувачкиот репортер Фред фон Болен-Хегевалд од Австрија кон југот на Европа па сè до Багдад во специјален „репортерски“ автомобил. Филмските слики што ќе ги сними тој во тие години на минатиот век се извонреден филмски документ за нас, особено затоа што минува низ повеќе места, како во Скопје, на пример, каде што ќе посети едно од дервишките теќиња и ќе ги сними тамошните обреди. Филмската проекција на овој прекрасен филм од немата ера ќе биде надополнета со оригинална музичка изведба во живо на Добрила и Доријан дуо.
Проекцијата на филмот „Калабака: Тајните на непознатата Европа“ е во соработка со EYE Filmmuseum од Амстердам, а како дел од таа соработка публиката, исто така, ќе може да го види и филмот „Брилијантниот биограф: Најраните подвижни слики на Европа“ (1897 – 1902) – компилација на филмови од најголемата зачувана збирка на „Мутоскоп и Биограф“ во светот.
Дел од фестивалската програма ќе биде циклусот филмови на германскиот режисер Волкер Шлендорф. Од депоата на Хрватската кинотека при Државниот архив на Хрватска, македонската публика ќе може да проследи три циклуси на кусометражни филмови: анимираните филмови произлезени од Студиото за анимиран филм на „Загреб филм“, потоа документарни и кратки играни филмови од хрватски автори, како и циклусот неми филмови во режија на хрватскиот филмски пионер Октавијан Милетиќ. Во рамките на оваа програма, гостин на фестивалот ќе биде и Јурај Кукоч, филмски архивист и филмски критичар од Загреб.
Покрај овие циклуси, на фестивалот ќе бидат прикажани неми и класични филмови од архивот на Кинотеката. Музичката придружба на немите филмови ќе ја изведува македонскиот џез-пијанист, аранжер и композитор Гордан Спасовски.
Прв дел од фестивалската програма:
29 AВГУСТ (ВТОРНИК)
20:00 ч.: 1991. АДИО ЈУГО ФИЛМ, АДИО ЈУГО ФЕСТИВАЛ, АДИО ЈУГОСЛАВИЈА… СЕ ГЛЕДАМЕ ВО СЛЕДНАТА ВОЈНА (1991. Adio Jugo film, adio Jugo festival, adio Jugoslavija… vidimo se u sljedećem ratu)
30 АВГУСТ (СРЕДА)
19:00 ч.: СТЕПЕН НА УБИСТВО (Mord und Totschlag / Degree of Murder)
21:00 ч.: КАЛАБАКА: ТАЈНИТЕ НА НЕПОЗНАТАТА ЕВРОПА (Kalabaka: Die Geheimnisse des unbekannten Europas / Kalabaka: The Secrets of Unknown Europe)
31 АВГУСТ (ЧЕТВРТОК)
12:00 ч.: Мастерклас на Елиф Ронген-Кајнакчи, куратор на неми филмови во Eye Filmmuseum
КАКО ДА СЕ ИДЕНТИФИКУВА НЕМ ФИЛМ?;
МУЗИЧКИ ПАРТИТУРИ ЗА ПРИДРУЖБА НА НЕМИ ФИЛМОВИ НА ПЛАТФОРМАТА НА EYE FILMMUSEUM – EYE FILM PLAYER
17:00 ч.: Изложба „Македонски филмски плакат“
21:00 ч.: БРИЛИЈАНТНИОТ БИОГРАФ: НАЈРАНИТЕ ПОДВИЖНИ СЛИКИ НА ЕВРОПА (1897 – 1902) (The Brilliant Biograph Earliest Moving Images of Europe 1897 – 1902)
Книга: Роман „Единствен матичен број“ на Лидија Димковска
„Единствен матичен број“, новиот наслов на една од најуспешните македонски романсиерки е приказна за нарушените семејни односи, за отуѓеноста од самите себеси и за молкот кој во ниту еден случај не може да биде решение на проблемите. Романот на Димковска начнува меѓугранични психолошки состојби на умот и на читателите им претставува галерија од ликови во кои секој може да се пронајде по малку во современото дивеење и отуѓување.
Постоиш ако имаш ЕМБГ. Домот не треба да биде скривница, ниту засолниште. Ниту прибежиште, зашто во него не треба да си бегалец. Треба да си името, а не бројката. Не постои поголемо отфрлање од тоа да си гостин во сопствениот дом.
Доаѓа време во животот кога сè одеднаш ти се истура врз глава и те поплавува. Врските се распаѓаат, суштинските работи што останале закопани во долгогодишен молк се претвораат во рак… Мигови кога веќе не можеш да дишеш во тесниот стан, кога си толку осамен и отуѓен од луѓето кои треба да ти се блиски што едноставно мораш да заминеш некаде за да не се изгубиш самиот. Но каде да се замине тогаш, која пустелија да се фати за да може одново да се изгради светот во себе?
„Единствен матичен број“ е освестувачки роман за нашиот свет што заборавивме да го сакаме. Трогателна приказна за обесчовечувањето на човештвото, потрага по утопијата на идентитетот преку дистопијата на животот.
-ЕМБГ е одредница без која не постоиш, не си на списокот на родените, живите, а и на мртвите. Ако немаш ЕМБГ немаш идентитет на жител, државјанин, човек, што е, секако, небулозно и поразително. Постоиш само ако имаш ЕМБГ. Од друга страна, пак, имањето ЕМБГ не значи и чувство на автоматско припаѓање на една средина, држава, нација. Во романот „Единствен матичен број“ главниот лик не му припаѓа ни на сопственото семејство, а ни себеси, посочи Димковска на неодамнешната промоција на романот.
„Единствен матичен број“ е издание на Издавачкиот центар ТРИ.
Музика: Концертна промоција на албумот „Голи песни“ на Хана Корнети
Независниот музички издавач Шарла Рекордс продолжува со одбележување на 10-годишнината од своето постоење со нова концертна промоција во музичкиот бар Ла Кања.
Повод за следниот од серијата настани ,,Шарла – 10 лета околу” е неодамна излезениот деби албум на скопската кантавторка Хана Корнети. Оваа мултиталентирана девојка веќе и е позната на книжевната јавност со својата збирка раскази ,,Млечни заби”, а во музичките води влегува со албумот „Голи песни“, реализиран за Шарла.
Концертната промоција на албумот „Голи песни“ на Хана Корнети ќе се случи во сабота (26 август) во специјално адаптираниот амбиент на терасата на барот Ла Кања во Старата скопска чаршија, со почеток во 21 часот.
Се работи за збирка од осум композиции отсвирени на укулеле и отпеани во современ и автентичен стил со текстови кои го задржуваат вниманието. „Голи песни“ е музички материјал кој освојува на прво слушање, искрен е и непосреден, напишан и изведен во слободен стил и без калкулации со актуелните музички трендови.
Снимен е и обработен во тонското студио Кларион, а во неговата реализација како музички соработник и продуцент се појавува Давид Ангелевски.
