Skip to content
Од Фаренхајт до Алиса во земјата на чудата се движи книжевниот избор на Јулијана Величковска, авторка, преведувачка, уредничка и страствена читателка. Таа го споделува нејзиниот избор од топ 5 наслови како предлог за читателите на Трн за долго читачко лето.
Јулијана дипломирала на Филолошкиот факултет „Блаже Конески“ при Универзитетот „Св. Кирил и Методиј“ во Скопје. Основач е на издавачката куќа „ПНВ Публикации“ од Скопје, коосновач и директорка е на „Скопскиот поетски фестивал“ и програмска директорка на „Поетска ноќ во Велестово“, Охрид. Член е на Друштвото на писателите на Македонија. Таа е авторка на неколку стихозбирки и книга за деца.
Во последно време интензивно се дружи и со најмладата публика преку нејзината најнова книга за деца „Ведра“.
1. „Фаренхајт 451“ од Реј Бредбери, зашто е книга што ја има предвидено и ја критикува денешницата, време на цензури, на палење книги… време кога огнот има спротивна улога од таа како симбол на знаењето, книга што јасно говори за битката на индивидуата во општество што преферира лесноманипулативна проста маса и конформизам.
2. „Човекот што зборуваше змиски“ од Андрус Кивирахк, оти е исклучителна книга полна фантастика, естонски фолклор и традиција. Приказна за изумирањето и крајот на епохите. Остра критика на човечката глупост, на помодарството и постојаното жалење по некој одамна згаснат начин на живот, критика на суеверните и религиозните фанатици, на сервилната природа на малите народи кон вредностите на империјалистите, почнувајќи од стариот Рим па сѐ до ден-денес… Книга за љубовта и пријателството, за семејните вредности и за загубите… За потрагата по смислата на животот додека околностите постојано се менуваат… И сето тоа раскажано со многу леснотија и со исклучителна смисла за црн хумор. И оти, меѓу другото, е и книга со силна еколошка порака.
3. „Епот за Гилгамеш“ оти е најстариот пишан споменик во светската литература во кој безвременски е раскажана приказната за сеприсутниот страв од смртта и потрагата по тајната на бесмртноста, но особено затоа што е приказна што нѐ учи да си ги сакаме „непријателите“, за важноста да се има достоен и рамен на себе противник, толку рамен, што ќе имаме чувство дека се бориме самите со себе, кој сепак, во нашите очи ќе е и подобар од нас ‒ мисла што ќе нѐ движи при тенденцијата да станеме подобри, и во вештините и како луѓе.
4. Поезија од младите македонски поети, оти имаме многу талентирана и активна генерација млади поети и важно е да ги поддржуваме домашните автори воопшто, особено младите, ако сакаме квалитетна и претставителна книжевна сцена и денес и во иднина.
5. „Алиса во земјата на чудата“ од Луис Карол, зашто е луда книга, од оние луди на најубав можен начин ‒ книга што ја поттикнува фантазијата и креативното размислување, книга што на многу необичен начин ја слика реалноста, ги соголува лагите и ја говори вистината. Зашто е книга што треба да се препрочитува!
