Skip to content
Директорот на Канал 5 телевизија, Иван Мирчевски вчера вечер се вклучи во емисијата „Само вистина“, за да му каже на гостинот, поранешниот пратеник Исмет Рамадани да ја напушти емисијата.
На Мирчевски не му се допадна тоа што го кажа гостинот, и реши да го отстрани од емисијата, ускратувајќи му го правото на слобода на говорот.
Аналитичарот на медиумите Петрит Сарачини од Институтот ИМА реагираше со ставот дека одлука за прекинување на ТВ емисија или ТВ дебата може да донесе новинарот, или уредникот/ главниот уредник, а не директорот или менаџментот на телевизијата, особено не со директно јавување во живо, во кое бара од поканетиот гостин да ја напушти емисијата!
-Освен што може да се толкува како цензура и кршење на слободата на говор, тоа што го видовме денес на Канал 5 може да се смета и како директно кршење на автономијата на редакцијата од страна на менаџментот. Така се гледа на овие работи во демократски земји“, пишува Сарачини.
Сарачини ги предизвика професионалните и етичките новинарски тела.
-Како ќе реагираат на овој инцидент професионалните и етичките новинарски тела, ќе видиме деновиве. Тие реакции ќе бидат огледало во кое ќе се рефлектира капацитетот на новинарскиот еснаф да ја одбрани независноста и дигнитетот на професијата!“ – заклучи Сарачини во својата реакција на социјалните мрежи.
Реагира и политичкиот коментатор Зоран Иванов во текстот за ЦивилМедиа, велејќи дека Канал 5 и популарната емисија „Само вистина“ не го заслужиле тој третман од страна на дитекторот на телевизијата.
-Не бев директен сведок пред ТВ екранот, но според одгласите и видео парчињата што вечерва веднаш по популарната дебатна и полемична емисија ги преплавија социјалните мрежи, „терористичкиот“ упад на телевизискиот директор, кажано во оваа една реченица, беше негово менаџерско фијаско, непримерен атак врз автономноста на конкретната емисија и, притоа, неговиот обид да го заштити водителот, го сведе на „мечкина услуга“ зашто младиот и, сепак, искусен новинар, во мал милион идентични водителски и домаќински ситуации досега, пред своите соговорници и пред телевизискиот аудиториум, докажал дека умее да се справува со „немирните“ гости иако овој пат и тој подлегна пред авторитетот на својот актуелен претпоставен и, сето, наспроти нивната недвосмислена обврска по секоја цена да го испочитуваат својот гостин колку, според нивниот суд, тој и да направил некаков непримерен вербален “деликт“, попрецизно, не само гостинот туку да ја испочитуваат и да ѝ дозволат и на јавноста, на гледачите, таа и тие, да го донесат судот за причината која ги вознемирила домаќините зашто, ако ништо друго, Канал 5 и популарната „Само вистина“, вечерва тоа не го заслужија.
Замир Мехмети, поранешен член на Советот за радиодифузија (денес Агенција за аудио и визуелни медиумски услуги – АВМУ) во неговата реакција на Фејсбук вели дека Иван Мирчевски е срам за новинарската фела и фактот дека е директор на национална телевизија говори доволно до кое дереџе за жал денес се медиумите
– Како поранешен член на Советот за радиодифузија денешна Агенција за аудио и визуелни медиумски услуги згрозен сум но не и изненаден од настапот на директорот на Канал 5 – Иван Мирчевски. Велам не сум изненаден имајки го предвид фактот дека со дотичниот сум имал можност да дебатирам кога во Советот имавме дебата за родова еднаквост во националните телевизии и одблиску се уверив дека се работи за ноторен лажго и опасен манипулатор, кога без срам не убедуваше дека во телевизијата каде он е директор нема никаква дискриминација, па дури дека жените се најгоре на пиадесталот, додека во исто време во Канал 5 се емитуваше шоуто на Миленко кое од почеток до крај беше преполно со говор на омраза, со расна, родова и етничка дискриминација, а директорот се правеше наудрен или „јас нисам одавде” Во тоа време Миленко во неговата емисија ја навредуваше новинарката Мери Јордановска со најдолни зборови, ширеше невиден говор на омраза кон неа и кон други нејзини колешки и колеги новинари. Во еден момент му реков – Нели Ви е срам директоре да држите вакво лажно предавање за родова еднкавост, додека Миленко навредува и шиканира новинарки во телевизијата каде Вие сте директор? Он на тоа со наведната глава кратко одговори дека тоа шоу е од приватна продукција и они не смеат да се мешаат во уредувачката политика. Сакаше да се сокрие под едно штуро десет секундно делче пред почетокот каде се велеш дека ставовите во емисијат не се ставови на телевизијата, истакнува Мехмети.
Вечерва бевме сведоци дека овој човек си дозволува за право да се вмеша среде емисија и да побара почитуваниот, коректниот и умерниот Рамадани да го прикаже како националист и да побара негово остранување од емисијата и прекинување на истата.
И замислете да ни се продаде сите нам гледачите како отворен, неоптоварен и професионален човек и новинар, со булшити од типот јас имам многу браќа Албанци, како тоа да е нешто многу ненормално, а ете он широкиот сепак нема проблем со тоа, наведува Мехмети во неговата реакција.
