Skip to content
Лидерите на ВМРО-ДПМНЕ Христијан Мицкоски и на ДУИ Али Ахмети на десетина дена пред парламентарните избори и вториот круг од претседателски избори, продолжуваат со политичките препукувања.
Почнувајќи од реториката на Мицкоски, која во рамките на кампањата на кандидатката за претседател на државата поддржана од нив и коалицијата, Гордана Силјановска-Давкова, како и на промотивните митинзи за парламентарните избори ја критикува Демократската унија за интеграција полн со обвинувања на нејзините највисоки партиски и државни функционери, за криминал и корупција. Мицкоски во пораките од митинзите често наведува и дека изминативе години стотина луѓе од ДУИ и неколкумина од СДСМ станале граѓани од прв, додека сите други се граѓани од втор ред во државата.
На ова реагираше лидерот на ДУИ, Али Ахмети, од големиот митинг на плоштадот во Скопје, порачувајќи му на Мицкоски да внимава што зборува против Албанците со дискриминаторски јазик.
„Јас патував малку подолго, и едвај чекав да дојдам тука кај вас за да му кажам неколку збора на Христијан Мицкоски. Христијан Мицкоски е пораснат со бисквити. Јас сум пораснат во кула од камен што трипати е изгорена од освојувачите. Христијан, народот мој вели дека камен по камен се гради тврдината, збор по збор започнува бељата, не започнувај беља. Не започнувај беља и избирај ги зборовите, уште си млад и од устата млеко ти излегува“, рече Ахмети по што следуваше скандирање од симпатизерите со „УЧК“, а во еуфоријата им се придружи и Ахмети.
Мицкоски преку објава на Фејсбук му одговори дека нервозната реакција на Ахмети уследила откако тој ги повика опозициските партии на Албанците на обединување, и најави дека има намера уште првиот ден по изборите да контактира со нив за заедничка соработка, која ќе се темели на принципи околу кои ќе се обединат.
Заканите, вели Мицкоски, не го заплашуваат и доаѓаат од човек пред политичка пензија, „малку и заборавен, но со добро грло кое го вежба пеејќи по државни институции и партиски прослави“.
„Вчера во Аеродром и Гази Баба ја повикав албанската опозиција на обединување против оваа власт и изразив јавна намера дека веднаш по изборите, уште првиот ден ќе остварам контакт со нив за заедничка соработка која ќе се темели на принципи околу кои ќе се обединиме. Уште истиот ден се јави Али Ахмети, нервозно одговарајќи, прозивајќи ме со навреди и доза на закани, но треба да знае дека неговите закани не само што не ме заплашуваат, туку и добро ме засмејуваат“, напиша Мицкоски на својот фејсбук-профил.
Мицкоски до Ахмети: Престанете да ми праќате емисари и курири за коалиционирање
Веднаш по првиот круг на претседателските избори каде што Гордана Силјановска – Давкова направи политички „земјотрес“ освојувајќи речиси недостижни гласови наспроти нејзините противкандидати, лидерот на ВМРО-ДПМНЕ излезе на прес – конференција и упати повик за коалиција кон албанската опозиција „ВЛЕН“.
Од друга страна „ВЛЕН“ овие изјави ги дочекаа како добредојдени, и кажаа дека тие се победници кај албанскиот електорат, алудираќи дека нивната коалиција имаат само албански гласови и се единствените легитимни претставници на албанците.
Ова изјава наиде на негодувања од Демократската унија за интеграција кажувајќи дека тие се победници на изборите кај албанскиот табор, дека не може Мицкоски или кој било друг од македонските партии да одредува кој ќе биде во наредната влада, туку тоа го одредува Албанскиот народ, а тоа се „Европскиот фронт“.
Ахмети од Кичево ги коментираше овие изјави на албанската опозиција кои наведуваат дека се убедени дека ќе бидат дел од идната влада.
„И другата страна ќе го почитува ова бидејќи нема друг избор. Се сеќавате ли Зоран Заев кога пред четири години излезе „ДУИ – опозиција“, така велеше. Излегува ВМРО на Мицкоски и вели „ќе ги земам другите, а ДУИ ќе оди во опозиција. Не е Мицкоски кој одлучува дали ДУИ оди во опозиција, туку граѓаните“, порача Али Ахмети.
Ова реторика на тоа кој ќе ја состави идната влада, а за потсетување, се уште не се оддржани парламентарните избори, продолжи и деновиве.
Лидерот на ВМРО-ДПМНЕ Христијан Мицкоски пак упати низа критики до ДУИ. Тој од митинг во Битола повика на масовно гласање на 8 мај и изјави дека неговата партија партнерот за формирање влада ќе го бара во албанската опозиција, во партиите со кои ќе споделуваат исти вредности и принципи, а за ДУИ, потенцираше дека е време за опозиција и за одговорност.
Мицкоски упати порака до ДУИ да не му праќаат „емисари“ и „курири“ за да размислел за коалиција после изборите.
-И една порака до ДУИ. Овие денови сум преплавен со пораки и абери кои ми ги праќаат од Речица. Па како човек секогаш сум бил директен, престанете да ми ги праќате оние емисари и курири по разно разни канали кои велат да сум размислел да направиме коалиција после изборите. Не знам дали знаете или не, но јас не сум ви Ковачевски, ниту неговиот претходник. Со мене такви договори на штета на народот и под маса немало и нема да има, рече Мицкоски.
Време е, според него, ДУИ да биде заменето со партии кои ќе работат за сигурна иднина на сите граѓани и со која заедно ќе се бориме за заедничката иднина.
Мицкоски потенцира дека ДУИ секогаш кога краде највеќе, се прикрива со национални и етнички теми, а денес тие се прикриваат зад завесата Европа.
-И додека устите им се полни со Европа, а Ковачевски понизно ги слуша и коленичи пред Ахмети, него го слушаме среде Скопје како скандира УЧК, УЧК, рече Мицкоски.
Ахмети од Дебар му возврати дека Ослободителната народна армија (ОНА), во јавноста позната како УЧК, е гордост на Албанците и оти ја спасила Македонија.
– Оваа земја има свое место во Европа и за оваа земја мора да работиме заедно, Македонци и Албанци, а не да се враќаме во минатото и да се огорчуваме затоа што викав УЧК, но УЧК е албанска гордост и УЧК ја спаси Македонија, вели Ахмети.
Во врска со изјавата дека му праќа емисари за да влезе безусловно во Владата, тој рече дека во политиката влегол како востаник и дека не е сервилен.
„Мицкоски има дадено изјава дека наводно му праќам емисар да преговара за влез во Владата. Христијан, во политиката влегов како востаник и нема да излезам без да се откажам, да се разбереме, народот ме гласа 22 години. Јас формирав фронт со албанските политички партии, но го направив овој фронт непобедлив со вклучување на заедниците кои вие ги презирате, како што се турската, ромската и босанската заедница. Се трудиме овој Устав што го направивме уште поблизок до граѓаните на Република Македонија да ги вклучи бугарската, египетската, црногорската и хрватската заедница. Охридскиот договор и промената на политичко-правниот статус на Албанците не ја уништија Македонија“ изјави Ахмети.
Тој порача дека Европскиот фронт ќе биде победник на изборите на 8 мај и дека народот ќе одлучи кој ќе биде дел од Владата.
„Опозицијата да не ги прави грешките што ги направи мојот поранешен колега во 2006 година и тогашната партија ја направи таа грешка и плати висока цена. Ние Албанците не сме претставници на малцинство, ние сме легитимни претставници на огромното мнозинство Албанци, а сега во Фронтот се и ромската, турската и босанската заедница. Па со тие шифри што ги пеат, тие никогаш не одлучуваат, одлучува народот. Значи, на 8 мај сите да гласаат за Фронтот, затоа што вие гласате за интеграција и изолација“ дополни Ахмети.
„Битка“ на Фејсбук: Османи и Таравари со меѓусебни „убоди“
Двајцата претседателски кандидати кои се натпреваруваа во првата првиот круг на претседателските избори, Бујар Османи од Европскиот фронт и Арбен Таравари од коалицијата „ВЛЕН“, во текот вчера се „судриле“ од далечина во врска со последните случувања политичката сцена во земјава. особено по изјавите на лидерот на ВМРО-ДПМНЕ, Христијан Мицкоски, дека како дел од идната Влада ја преферира албанската опозиција – ВЛЕН.
„Некои партиски лидери ги молат навечер оние што ги навредуваат преку ден“ – пишува во објавата на Арбен Таравари на Фејсбук.
Ова може да се протолкува дека ДУИ праќа емисари на Мицкоски да преговараат за идната влада.
„Не плаши се Арбен, нема да ви го земеме Мицкоски, ние ја бараме довербата од граѓаните“ – веднаш реагираше Бујар Османи на Фејсбук.
Идентично сценарио како во 2006 година, но со други актери
Во речиси идентично сценарио во 2006 година, тогашниот мандатар на ВМРО-ДПМНЕ Никола Груевски победи на изборите и го доби мандатот за состав на новата влада од претседателот Бранко Црвенковски, а кој на 28 август беше избран за премиер на владата. Во составот на владата влегоа претставници на коалицијата предводена од ВМРО-ДПМНЕ, ДПА и НСДП. Владата ја поддржаа и ДОМ и ПЕИ, кои сепак не добија министерски места. ВМРО-НП гласаше за владата, но не учествува во владината коалиција.
За време на ова владеење имаше политички тензии, особено поради тоа што ДУИ со 17 пратеници не беше дел од владината коалиција, а во Собранието не можеа да поминат законите што требаше да поминат со Бадентер.
Па така мандатот на ова влада заврши на 26 јули 2008 година, кога и беа распишани предвремени парламентарни избори. ВМРО-ДПМНЕ на изборите во 2008 година освои 63 пратеници (нивниот најдобар резултат досега), СДСМ на чело со Радмила Шекеринска освои 27 пратеници, ДУИ – 18, ДПА со Мендух Тачи – 11, ПЕИ – 1. Груевски повторно стана премиер и наместо на ДПА, ДУИ за првпат влезе во владината коалиција со ВМРО-ДПМНЕ, по таканаречениот Мајски договор меѓу Груевски и Ахмети, според кој победничките партии од македонскиот и албанскиот блок ја формираат владината коалиција.
Но овој договор „интергративците“ на Ахмети го прекршија во 2016 година откако се договорија со СДСМ да направат влада, иако имаа освоено помалку пратеници.
Дали повторно ќе имаме политички тензии и како ќе се решава прашањето за надминување на Бадентеровиот принцип во Собрание во случај албанската опозиција да не обезбеди повеќе пратеници, останува да се види.
Назми Абдурахмани во соработка со Дамјан Варошлија (ЦивилМедиа)
