Украинскиот министер за одбрана сака да ги мобилизира сите Украинци на возраст за регрутирање кои живеат во странство

Украина би сакала сите Украинци на возраст за регрутирање, кои моментално живеат во странство, да ги посетат центрите за регрутирање на украинските вооружени сили. Украинскиот министер за одбрана Рустем Умеров го изјави ова во интервју за германските медиуми Билд, Велт и Политико, пренесува Укринформ.

„Сите украински мажи на возраст од 25 до 60 години треба да добијат покана да се пријават во центрите за регрутирање на украинските вооружени сили. Сакаме правда за сите, бидејќи се работи за нашата сопствена земја. Ќе им испратиме покана“, рече Умеров.

Потпретседателот на Билд, Пол Ронцхајмер, вели дека оваа објава е „политички експлозивна и може да има сериозни последици за стотици илјади Украинци кои живеат во странство“. Тој потсети дека во првото интервју што министерот го даде за европски медиум надвор од Украина, тој се закани и со санкции за оние кои нема да го исполнат барањето да се приклучат на армијата.

„Сепак, сè уште не е утврдено какви ќе бидат овие санкции. Сè уште разговараме што треба да се случи доколку не дојдат доброволно“, рече Умеров.

Тој рече дека во иднина на засегнатите треба однапред да им биде јасно како ќе бидат обучени и опремени, каде и кога ќе служат и кога ќе бидат отпуштени. Ќе има и „избори“ за регрути според нивните можности.

Билд разговараше и со министерот за одбрана за воените цели на Украина и меѓународната поддршка. Умеров рече дека е полн со оптимизам, па дури и убеден дека полуостровот Крим, кој беше анектиран од Русија во 2014 година, може да биде ослободен следната година.

„Сто проценти сум сигурен. Тоа е нашата стратешка цел“, рече Умеров.

Неговиот оптимизам, меѓу другото, се заснова на комуникација со партнерите, вклучително и САД, кои ќе продолжат да ја поддржуваат Украина.

Умеров ја истакна потребата од зголемување на бројот на средства за електронско војување, беспилотни летала, артилерија и муниција. Тој рече дека ракетите Таурус од германско производство се исто така на листата на желби на Украина.

„Дефинитивно ни требаат сите ракети со долг дострел од нашите партнери“, нагласи Умеров.

Во Германија од почетокот на руската инвазија на Украина, дошле 221.571 Украинци на возраст меѓу 18 и 60 години. Од нив, 189.484 мажи сега се во земјата.

Подготви: Ј. Ѓ. (Фронтлајн)