Евтината кинеска стока го загрозува европскиот пазар

Во Европската унија секој ден пристигнуваат околу 12 милиони мали пакети со облека, козметика и играчки нарачани преку кинеските платформи Shein и Temu, бројка која, според Европскиот економски и социјален комитет (ЕГСО), веќе директно го загрозува опстанокот на европските трговци и стотици илјади работни места.

Минатата година на територијата на ЕУ влегле 4,6 милијарди вакви пратки, а годинава бројот може да ја надмине границата од 6 милијарди, предупредуваат од ЕГСО. На конференцијата „Европски потрошувачки денови“ беше оценето дека сегашниот модел на on-line увоз создава „цунами“ кое европските системи повеќе не можат да го контролираат.

Кинеските платформи се обвинети за непочитување на европските стандарди за здравствена и техничка безбедност. Производителите што продаваат преку Shein и Temu не се обврзани на истите тестирања, ниту имаат обврска за рециклирање на вратената стока како во ЕУ. Поради тоа, производите често се 40% поевтини, покажуваат финските процени.

Но цената има своја сенка: според финските власти, прекумерниот увоз веќе го намалува бројот на работни места, го зголемува отпадот и внесува во Европа производи со сомнителен квалитет.

Во Данска, 90% од тестирани артикли купени преку овие апликации не ги задоволиле европските стандарди, а половината биле оценети како директно опасни.

Увозот во пакети до 150 евра не подлежи на царина, поради што многу држави остануваат без значителни буџетски приходи. Финска, на пример, бележи скок од 1 милион на 50 милиони пакети за само три години.

Кога пристигнува контејнер, инспекторите можат да тестираат примерок и да вратат цела пратка. Но кај милиони индивидуални пакети, тоа е невозможно.

Франција неодамна изврши масовна контрола на 200.000 пакети од Shein кои пристигнале за 24 часа. Резултатот: 80% од производите биле спротивни на стандардите.

Европскиот комесар за заштита на потрошувачите, Мајкл Мекграт, најави:

– Пакетите со вредност под 150 евра повеќе нема да бидат ослободени од царина.
– Ќе има засилени проверки на производите што влегуваат во ЕУ.
– Ќе се бара подобра контрола уште во Кина, пред стоката да тргне кон Европа.

Слични примери има и низ целиот континент за многумина, евтините платформи се финансиско олеснување; за други, сериозна економска и безбедносна закана.