Skip to content
На Вол Стрит, индексите S&P 500 и Nasdaq достигнаа нови рекордни нивоа, главно поради растот на цените на акциите на неколку големи технолошки компании пред објавувањето на нивните квартални деловни резултати.
Индексот Dow Jones забележа благ пад од 0,04 проценти и се затвори на 44.323 поени, додека S&P 500 порасна за 0,14 проценти и достигна 6.305 поени, а Nasdaq се зголеми за 0,38 проценти, на 20.974 поени.
Овие рекордни достигнувања на S&P 500 и Nasdaq се резултат на очекувањата дека деловните резултати на водечките технолошки компании ќе ги надминат прогнозите на аналитичарите.
Меѓу другите, „Алфабет“ и „Тесла“ ќе ги објават своите финансиски извештаи утре. Акциите на „Алфабет“ скокнаа за 2,7 проценти, на „Амазон“ за 1,4 проценти, а на „Епл“ за 0,6 проценти. Од околу 70 компании во индексот S&P 500 што досега ги објавија своите деловни резултати, над 80 проценти пријавиле заработка повисока од очекуваната.
Според анкета на Ројтерс, аналитичарите проценуваат дека добивката на компаниите во индексот S&P 500 пораснала за 6,7 проценти во вториот квартал, споредено со истиот период минатата година.
Фокус на трговските преговори
„Компаниите што досега ги објавија своите резултати ги исполнија очекувањата од претходниот квартал, а досега ниту една не ги намали своите прогнози за иднината, што е охрабрувачки сигнал“, изјави Томи Хејнлин, стратег во U.S. Bank Wealth Management.
Покрај деловните извештаи, оваа недела инвеститорите со внимание ќе ги следат вестите за трговските преговори меѓу САД и нејзините трговски партнери. Причината е најавеното воведување на високи царини на увозот од земјите што до почетокот на август нема да постигнат трговски договор со САД.
