Првпат откако е воведен „МојДДВ“ не е исплатен навреме. Еве зошто?

Исплатата на поврат на Данок на додадена вредност (ДДВ) за граѓаните преку апликацијата „МојДДВ“ за третиот квартал (јули-септември) од 2025 година е одложена. Иако законскиот рок за исплата е до 30 ноември, значителен дел од корисниците не ги добија своите средства до 28 ноември, што предизвика реакции во јавноста. Досега се исплатени 552 милиони денари, а уште 370 милиони денари се подготвени за исплата.

Директорката на Управата за јавни приходи (УЈП), Елена Петрова, како причина за доцнењето ги наведе техничките проблеми. Таа посочи дека застоите може да се должат на невалидни или неажурирани трансакциски сметки на граѓаните во системот на УЈП. Министерството за финансии, исто така, потврди дека најчести проблеми се поврзани со погрешно внесени податоци за сметките.

Ова е првпат откако системот „МојДДВ“ беше воведен во 2019 година, да дојде до вакво доцнење во исплатата на средствата. Во минатото, повратот на ДДВ за претходното тримесечје обично се вршеше многу порано, најдоцна до 10-ти или 15-ти во месецот по завршувањето на кварталот, иако законскиот рок е 60 дена.

Програмата „МојДДВ“ е воведена со цел да се врати дел од платениот ДДВ на граѓаните, со што се стимулира пријавувањето на прометот и се намалува сивата економија. Граѓаните скенираат фискални сметки преку мобилна апликација или десктоп апликација, а потоа добиваат поврат од 10% или 20% од пресметаниот данок, со максимален износ од 2.100 денари по квартал.

Доцни поврат на ДДВ за компаниите. Покрај доцнењето за граѓаните, постојат и проблеми со повратот на ДДВ за компаниите, при што некои фирми чекаат средства и до една година. УЈП објаснува дека ова се должи на зголемените контроли при проверка на документацијата, при што половина од барањата за поврат покажале неправилности.