Skip to content
Кандидатката на СДСМ за градоначалничка на Скопје, Каја Шукова, остро ја критикуваше четиригодишната локална власт предводена од ВМРО-ДПМНЕ, оценувајќи дека главниот град „западнал во хаос“ и дека интересите на скопјани биле „целосно игнорирани“. Во изјава до медиумите, таа порача дека „граѓаните точно знаат кој го доведе Скопје до оваа состојба“ и дека следните избори се моментот за промена на насоката.
Според Шукова, последиците од лошото управување се видливи секојдневно и ги детектираше како
- ослабен и непредвидлив јавен превоз,
- запуштена градска хигиена и преполни контејнери,
- „културно пропаѓање“ на градот.
Шукова на денешната прес конференција рече: „Скопјани очекуваат решенија, а не хартиени мегапроекти. Очекуваат чист, уреден и културен град и градоначалник со визија и план“, нагласи таа, додавајќи дека метрополата „никогаш не била толку далеку од своите граѓани“ и дека, според неа, градот бил жртва на партиски пресметки.
Адресирајќи го противкандидатот на ВМРО-ДПМНЕ, Орце Ѓорѓиевски, Шукова говореше за „поддршка на криминално дивоградителство и урбанистички хаос“ и го поврза со коалициските партнери од ВЛЕН. „Наместо одговорност и решение, гледаме позирање“, рече таа, оценувајќи дека градот не смее да добие уште еден градоначалник „кој ќе работи за профитот на владејачката елита“.
Кандидатката на СДСМ ја заостри реториката кон актуелното градско управување, нагласувајќи дека, според неа, „време е да се порази политиката која го третира Скопје како партиска каса“. Таа подвлече дека граѓаните бараат „конкретен план без лажни ветувања“, со акцент врз секојдневните услуги и јавниот интерес.
Шукова ги повика скопјани активнo да учествуваат на изборите на 19 октомври, оценувајќи ги како „можност за вистинска промена“. „Скопје мора да добие градоначалник кој обединува, не дели; кој не фаворизира елити, туку работи исклучиво за својот град“, порача таа.
Со интензивирање на кампањата, фокусот ќе остане на темите што директно го засегаат секојдневието: чистотата, сообраќајот, јавниот превоз и урбанистичкиот ред. Изборната трка, според најавите на штабовите, ќе понуди остри спротивставувања, но и мерливи ветувања за првите 100 дена во градската куќа. Во текот на периодот до гласањето, јавноста ќе очекува и јавно соочување на кандидатите со детални план-програми, рокови и буџетска рамка.