Шукова: Скопјани ќе ја имаат заслужената поддршка и можност

Сите граѓани заслужуваат поддршка и можност, а активните и вклучени заедници се основа на силен град, пишува во програмата на кандидатката за градоначалничка на Скопје од СДСМ и коалицијата Каја Шукова.

Според Шукова оваа своја визија вели дека ќе ја оствари во неколку фази. Во првата фаза, Шукова најавува проширување на социјалните услуги за ранливите групи, вклучувајќи ги лицата со попреченост, старите лица и сиромашните семејства.

Паралелно со ова е предвидено создавање програми за здравствена и социјална поддршка во заедницата со основање на Фонд за лица во ризик.

На среден рок, Шукова има зацртано изградба на нови центри за дневна грижа за старите лица и лицата со хендикеп. Грижата за овие наши граѓани опфаќа и субвенции за социјално ранливи категории. На пример за еколошко затоплување, енергетска ефикасност на домовите и друга поддршка.

Активната грижа во програмата на Шукова за нив опфаќа и воведување програми за вработување и обука за ранливите групи.

Предвидена е изградба на мултисензорни соби во средните училишта, за учениците со попреченост и воспоставување регистер на имотот на Град Скопје со цел да се процени капацитетот за помош и поддршка на шелтер-центрите.

На долг рок Шукова предлага создавање сеопфатен систем за социјална поддршка што ги спречува и ги утврдува сите форми на социјална исклученост.

Како дополнителен проект на долг рок е изградбата на институции за грижа на возрасните лица и адаптација на јавните простори за потребите на пензионерите со цел да се изгради инклузивен град, каде што сите граѓани имаат еднакви можности.