Skip to content
Олександар ЛЕВЧЕНКО
Во ноќта на 26 мај, Руската Федерација изврши рекорден напад врз Украина, користејќи вкупно 364 воздушни офанзивни средства – меѓу кои 9 крстосувачки ракети тип Х-101, лансирани од стратешки бомбардери Ту-95МС, и 355 ударни беспилотни летала од типот „Шахед“ и други дронови. Сите девет ракети биле пресретнати, а украинската противвоздушна одбрана неутрализирала 288 дронови.
Ова беше трет последователен ден на масовни воздушни напади. Во ноќта на 25 мај, Русија употребила 9 балистички и 60 крстосувачки ракети, како и 298 дронови – од кои 47 ракети и 266 дронови биле уништени. На 24 мај, Москва извршила комбиниран напад врз Киев со 14 балистички ракети „Искандер-М“ и 250 дронови, од кои 6 ракети и 245 дронови биле соборени.
Полска неколкупати испрати воени авиони во воздух поради ракетните закани, при што биле активирани сите безбедносни процедури.
Украинскиот претседател Володимир Зеленски ја повика меѓународната заедница да го засили санкцискиот притисок врз Русија, истакнувајќи дека агресијата нема да престане без надворешен отпор и поддршка за украинските одбранбени капацитети. Тој потврди дека нападите предизвикале повреди, уништени куќи и трговски центар. „Русија секој ден носи тага, убиства и го продолжува војниот ужас“, рече Зеленски, повикувајќи на остар одговор од САД, Европа и светот. Според него, Украина е подготвена за секој дипломатски напор што носи резултат, но Русија не покажува никаква волја за мир.
Американскиот претседател Доналд Трамп, по смртоносниот напад на 26 мај со најмалку 12 загинати и преку 70 повредени, конечно го осуди руското насилство. Тој изјави дека размислува за нови санкции и царини ако Путин не ја прекине агресијата. „Не сум задоволен од Путин. Тој фрла ракети врз градови и убива луѓе – тоа не ми се допаѓа“, изјави Трамп, додавајќи дека разгледува серија санкции, вклучително и „масовни банкарски санкции“.
Истовремено, американскиот Сенат подготвува закон за воведување „разорни“ мерки – вклучувајќи 500% царина за земји што купуваат руска енергија и забрана за американски државјани да купуваат руски државен долг. Целта е да се принуди Москва да седне на преговарачка маса.
Според Али Реза Резазаде, потпретседател на иранската опозиција во Вашингтон, нападите се не само воен злостор, туку и директна провокација кон американските мировни иницијативи. Тој предупреди дека секој дипломатски попуст кон Москва само го охрабрува агресорот. „Ако Путин не добие остар одговор, ќе продолжи со убиства. Следниот напад може да биде уште посилен“, рече Резазаде. Дури и специјалниот пратеник на Трамп за Украина, Кит Келог, ги нарече нападите „срамни“ и кршење на Женевските конвенции.
Од Брисел, високата претставничка за надворешна политика Каја Калас изјави дека ЕУ мора да го зголеми притисокот врз Русија за да ја принуди на мир. Таа нагласи дека на следниот состанок на министрите за надворешни работи ќе се разговара за координиран одговор.
Еврокомесарот за одбрана Андриус Кубилиус посочи дека без поддршка, Украина ќе биде принудена на капитулација. „Тоа би било повик за нова агресија. Единствениот излез е поголем притисок врз Москва и доследна поддршка за Киев“, истакна тој.
Германскиот министер за надворешни работи, Јохан Вадефул, ги повика западните сојузници на решителен одговор. „Путин не сака мир, туку продолжување на војната. Треба да воведеме построги санкции кои ќе ја погодат руската економија“, изјави тој. „Украина е подготвена за дијалог. Сега редот е на Путин.“
Русија продолжува со воздушниот терор врз Украина, а меѓународната заедница е под притисок да одговори со нови, остри санкции и воена поддршка. Дипломатските иницијативи се сѐ повеќе под прашање, додека украинските цивили секојдневно ја плаќаат цената на војната.
Олександар ЛЕВЧЕНКО e поранешен украински амбасадор во Хрватска и Босна и Херцеговина
