Skip to content
Петтата поетска книга на Пијан Славеј, „Пружини“, ќе биде претставена пред скопската публика во сабота, на 19 септември, во „Цреша бар“. Промоцијата почнува во 20:30 часот и ќе биде проследена со настап на Hot Jazz Orchestra заедно со авторот.
Наместо вообичаено книжевно претставување, „Пружини“ ќе биде промовирана преку средба на поетскиот збор и музиката. Ваквиот формат се надоврзува на изразот на Пијан Славеј, во кој поезијата не останува само на страницата, туку добива глас, ритам и непосреден контакт со публиката.
Новата збирка е изградена околу чувството на минливост и притисокот што времето го врши врз човекот. Во неа се соголуваат илузиите за вечноста, додека личната слобода се судира со ограничувањата на животните механизми и секојдневието.
Песните создаваат свет на пусти плажи, лето што исчезнува пребргу, остарени чевли и тело што ги памети и сонцето и дождот. Тоа е поезија за загубата и траењето, но и за љубовта како место во кое човекот, и покрај сè, продолжува да бара дом.
Во огледот поместен во книгата, издавачот Дејан Трајкоски ја опишува „Пружини“ како дестилирана слика на минливоста и растргнатоста и како најзрело поетско остварување на авторот.
Пијан Славеј досега ги има објавено збирките „Креветизам и хоризонтала“ од 2018 година, „Срчки“ од 2020, „Полиграф“ од 2022 и „Јазик за двајца“ од 2024 година. Со „Пружини“ продолжува поетската линија што ја гради во изминатите осум години.
Книгата е објавена од „Прозарт медиа“, со поддршка од Министерството за култура и туризам. Организатори на концертната промоција се „Прозарт медиа“ и „Цреша бар“.
