Skip to content
На 16-ти и 17-ти декември на големата сцена на Македонскиот народен театар (МНТ) ќе се одиграат две премиерни изведби на претставата „Замисли нов свет“. Оваа претстава, работена според мотиви од делата на Горан Стефановски, во режија на Нела Витошевиќ, претставува колаж од седум драми на авторот: „Црна дупка“, „Лет во место“, „Чернодрински се враќа дома“, „Диво месо“, „Сега му е мајката“, „Тетовирани души“, и „Кула вавилонска“.
Сцените се поставени во постмодернистичка рамка, а како сврзно ткиво се користат искомпнирани сонгови од Огнен Анастасовски. Во претставата играат познати актери како Игор Ангелов, Верица Недеска, Дамјан Цветановски и други, а сценографијата е на Константин Трпеноски, додека костимите ги потпишува Роза Трајчевска-Ристоска.
„Замисли нов свет“ се фокусира на безвременските теми од нашата заедница, раскажани преку препознатливите ликови од драмите на Стефановски. Овој проект е инициран од Телеком во рамки на нивната кампања #НаправиМесто, која се бори со општествените предизвици и поттикнува нивно решавање.
Претставата ќе остане на редовниот репертоар на МНТ по премиерата.
