Skip to content
Со внимателно одбрана програма што го комбинира најдоброто од актуелната светска џез сцена, 44. издание ќе биде предводено од силна американска поставa, со неколку ексклузивни настапи и премиери.
Во програмата, која ќе се одвива од 15 до 19 октомври, доминираат музичари од САД, меѓу кои и две вистински џез легенди – гитаристот Марк Рибо и перкусионистот Кахил Ел Забар, кои ќе настапат на иста вечер на 17 октомври. Финалната вечер, пак, ја носи најсилната изведувачка постава: Вадада Лео Смит, кого многумина го сметаат за најголемиот жив американски џез музичар, и Џејмс Брендон Луис, кој неодамна беше прогласен за музичар и тенор саксофонист на годината.
На 18 октомври, европската вечер нуди две извонредни постави – Горан Кајфеш со својот Tropiques проект, како и квартетот After the Wildfire, што ги обединува Јан Банг и Арве Хенриксен. Тие ќе го изведат проектот кој за првпат беше претставен во Скопје пред две години со голем оркестар, а сега е објавен и на винил.
Фестивалот ќе биде отворен на 16 октомври со настап на Националниот џез оркестар на Северна Македонија, кој првпат добива свое место на главната сцена, засилен со специјалните гости Зиги Фајгл и Луис Бониља. Истиот ден ќе настапи и полското трио на Анджеј Јагоджински, едно од најценетите имиња на полската џез сцена.
Дополнителен акцент на фестивалот се и двата музички документарци со ексклузивни европски премиери: „We Want the Funk!“ (15 октомври) и „Sun Ra: Do the Impossible“ (18 октомври), кои ќе бидат прикажани во МКЦ Кино Фросина.
Во рамки на програмата „Плус“, на 10 октомври ќе се одржи работилница „Jazz for Kids“ во Europe House.
Визуелниот идентитет на фестивалот и годинава го потпишува уметникот Џоле Јовановиќ.
Главна програма
16 октомври | НОБ | 20:00
- Andrzej Jagodziński Trio
- Национален џез оркестар со Sigi Feigl & Luis Bonilla
17 октомври | НОБ | 20:00
- Marc Ribot: Map of a Blue City
- Kahil El’Zabar’s Ethnic Heritage Ensemble
18 октомври | НОБ | 20:00
- After the Wildfire Quartet
- Goran Kajfeš Tropiques
19 октомври | НОБ | 20:00
- Wadada Leo Smith & Sylvie Courvoisier Duo: Angel Falls
- James Brandon Lewis Quartet
Jazz Cinema – документарни филмови
15 октомври | МКЦ Кино Фросина | 20:00
- We Want the Funk!
18 октомври | МКЦ Кино Фросина | 17:00
- Sun Ra: Do the Impossible
Програма Плус
10 октомври | Europe House | 18:00
- Jazz for Kids – работилница
Со импресивна програма што ги комбинира најголемите имиња на денешниот џез и ексклузивни премиери, Скопскиот џез фестивал 2025 уште еднаш ќе биде место каде се слави слободата на музиката и нејзината способност да ги надмине културните и географските граници.
