Skip to content
Иако делуат мирни и грациозни, нови научни истражувања откриваат дека фламингата се многу поголеми предатори отколку што се мислеше. Овие розеви птици ловат создавајќи мини-вртлози под површината на водата со кои го зашеметуваат пленот.
Фламингата, познати по нивното карактеристично розево перје што го добиваат од исхраната богата со алги и ракови, живеат во големи колонии и често формираат силни социјални врски. Но под водата се одвива комплексен ловечки процес кој научниците дури сега целосно го разјаснуваат.
Фламингата го потопуваат долгиот, закривен клун во водата и го „влечат“ по дното каде што стојат. Притоа создаваат мали вртлози што ги зашеметуваат ситните животинчиња, нивен главен плен, кои потоа директно завршуваат во клунот. За да ја зголемат ефикасноста, тие постојано го придвижуваат клунот напред-назад.
Според професорот Ортега Хименез, биолог од Универзитетот во Калифорнија, студијата била изработена врз основа на набљудувања во зоолошката градина во Нешвил и анализа на 3D модели на нозете и клунот на фламингата.
Истражувачите откриле дека птиците ги користат нозете за да го разбрануваат талогот на дното, туркајќи го пленот во воден вител кој го носи нагоре. Со брз, остар движок на главата, фламингото го всмукува пленот. За време на целиот процес, главата им е свртена наопаку кон дното, а со отворање и затворање на клунот тие ја филтрираат храната.
Фламингата имаат и уникатно сплескан, закривен клун кој, кога главата е наопаку, стои паралелно со дното, што им овозможува да собираат ситен плен од површината на водата. Во тоа им помага и нивниот препознатлив долг врат во форма на буквата S.
Научниците велат дека ова откритие отвора сосема нова перспектива за однесувањето и исхраната на овие атрактивни, но и изненадувачки вешти ловци.
