Хари ќе се сретне со Чарлс, но Вилијам ја одбил поканата

Британската јавност со внимание ги следи најновите случувања во кралското семејство, откако принцот Хари најави дека во септември ќе отпатува во Лондон за традиционалните награди WellChild и дека планира средба со својот татко, кралот Чарлс, кој моментално се лекува од рак.

Според британските медиуми, разговорот меѓу татко и син се очекува да биде приватен и неформален, без медиумска помпа, со цел да се зачува достоинството и довербата. „За првпат по долго време постои чувство дека помирувањето е можно,“ пренесува извор близок до семејството.

Но, обидот на војводата од Сасекс за пошироко семејно зближување наишол на пречка – неговиот брат, принцот Вилијам, категорично ја одбил поканата за средба. Овој студен одговор, според аналитичарите, дополнително ја комплицира можноста за целосно смирување на тензиите.

Во јули биле забележани контакти меѓу тимот на Хари и комуникацискиот секретар на кралот, што се толкува како подготовка за оваа средба. Сепак, Хари ќе патува сам, додека неговата сопруга Меган Маркл ќе остане со нивните деца во Калифорнија.

Кралот Чарлс, пак, е особено погоден што нема можност да поминува време со своите внуци – последен пат ги видел во јуни 2022 година, за време на јубилејот на кралицата Елизабета Втора.