Skip to content
Семејството на холивудската легенда Брус Вилис соопшти дека по неговата смрт ќе го донира неговиот мозок за научни цели, со што ќе придонесе за напредокот во истражувањата на фронтотемпоралната деменција (FTD) – болест со која актерот се бори веќе неколку години. Одлуката ја потврди неговата сопруга, Ема Хеминг Вилис, пишува Marca.
Вилис се повлече од актерската кариера во 2022 година поради дијагноза на афазија, а една година подоцна лекарите ја прецизираа состојбата како фронтотемпорална деменција – нарушување што постепено го менува говорот, однесувањето и личноста на пациентот.
Во новата книга на Ема Хеминг Вилис се открива дека семејството внимателно и долго ја носело оваа одлука, верувајќи дека донирањето на мозокот ќе им овозможи на научниците подлабоко да ги проучат промените предизвикани од FTD. Експертите сметаат дека ваквиот пример може да биде клучен за разбирање на структурните деформации, неправилните протеини и генетските мутации што тешко се откриваат за време на животот.
Трогателно сведоштво од неговата ќерка
На Instagram, Румер Вилис ќерката на актерот искрено проговори за прогресијата на болеста. Потврди дека татко ѝ сè поретко ги препознава најблиските.
„Благодарна сум што можам да го прегрнам, без разлика дали ме препознава или не. Уште ја чувствувам љубовта што му ја давам, а понекогаш навистина се појавува малата искра што ме потсетува на него,“ напиша Румер во емотивната објава.
Одлуката на семејството Вилис веќе предизвика силни реакции во научната заедница, која ја поздравува нивната храброст и хуманост. Според експертите, оваа донација би можела да стане од огромно значење за идните терапии и дијагнози на фронтотемпоралната деменција едно од најпредизвикувачките невродегенеративни заболувања на нашето време.
