Skip to content
Научниците развијаа нов начин на лекување кој кај дел од пациентите успева целосно да ја поништи агресивната и доскорешно неизлечива форма на рак на крвта, акутна лимфобластна Т-клеточна леукемија. Третманот се заснова на прецизно уредување на ДНК во белите крвни клетки, трансформирајќи ги во т.н. „жив лек“ што активно го напаѓа ракот.
Првата пациентка што го примила ваквиот третман, девојче со тешка форма на леукемија и денес нема никакви знаци на болеста и, според британските медиуми, планира да стане научник која ќе работи на истражување на малигни заболувања.
Во следната фаза од клиничките испитувања, уште осум деца и двајца возрасни со истата дијагноза биле третирани со генетски модифицирани клетки. Резултатите се извонредно охрабрувачки: 64 проценти од пациентите влегле во ремисија, што претставува најдобар исход досега кај оваа група болни.
Т-клетките: од заштитници до закана
Т-клетките, нормално задолжени за заштита на организмот од инфекции и тумори, кај оваа форма на леукемија стануваат неконтролирани и сами го предизвикуваат ракот. Кај учесниците во испитувањата, класичните терапии, хемотерапија и трансплантација на коскена срцевина, целосно пропаднале.
Освен експерименталниот третман, единствената преостана опција била палијативна грижа и олеснување на последните денови, пренесува BBC.
Овој медицински напредок дава надеж дека по години без ефикасен лек, гено-терапијата може да понуди реална шанса за излекување на пациенти со едно од најагресивните детски малигни заболувања.
