Skip to content
Европските новинари сè почесто се потпираат на алатки за генеративна вештачка интелигенција во својата работа, покажува најновото истражување на универзитетите во Гент и Амстердам, објавено вчера.
Според студијата, малку повеќе од половина од 286 испитани новинари во Белгија и Холандија користат алатки како ChatGPT на OpenAI. Од нив, 32 проценти ги користат неделно, додека 14 проценти се обраќаат на овие технологии секојдневно.
Најчеста примена на генеративната вештачка интелигенција е автоматски превод (45 проценти), транскрипција на интервјуа (35 проценти) и лектура на текстови (30 проценти). Испитаниците наведуваат дека главните причини за користење се заштеда на време, поголема ефикасност и инспирација при креирањето содржини.
Иако алатките се широко распространети, мнозинството новинари изразуваат загриженост. Според резултатите, 85 проценти сметаат дека генеративната вештачка интелигенција може да ја зголеми појавата на лажни вести, а 83 проценти веруваат дека технологијата може да ја поткопа довербата во новинарството.
Истражувањето нагласува дека генеративната вештачка интелигенција во голем дел ги поддржува постојните новинарски задачи, наместо да ги трансформира или редефинира процесите во редакциите. Овие алатки станаа особено популарни по глобалната експанзија на ChatGPT кон крајот на 2022 година и моментално се предмет на регулирање според Законот на ЕУ за вештачка интелигенција.
