Skip to content
Технолошкиот гигант Мајкрософт објави студија што предизвика големо внимание во јавноста – и загриженост кај многумина кои своето занимање го препознаа на листата на професии со најголемо преклопување со вештачката интелигенција. Според извештајот, овие податоци не значат дека машините ќе ги заменат луѓето, туку дека алгоритмите веќе покажуваат висока ефикасност во извршување на одредени задачи што традиционално ги работат луѓето.
На врвот на листата се наоѓаат преведувачите и толкувачите, со 98 проценти преклопување помеѓу нивните задачи и способностите на вештачката интелигенција. Потоа следуваат историчарите, математичарите и лекторите, со 91 процент, како и машинските програмери со 90 проценти. Меѓу најзагрозените професии се и писателите, статистичките асистенти, новинарите, уредниците и техничките писатели, со стапки на преклопување од 80 до 85 проценти.
Во групата на професии кои AI најмногу може да ги автоматизира се вбројуваат и телефонските оператори, стјуардите, берзанските службеници, политиколозите, географите и спикерите на радио и телевизија, чии задачи често вклучуваат обработка на информации, анализа или комуникација — области во кои вештачката интелигенција веќе постигнува забележителни резултати.
На спротивната страна, Мајкрософт наведува дека медицинските сестри, бродските инженери, молерите и работниците во постројки за пречистување вода спаѓаат меѓу најотпорните на влијанието на вештачката интелигенција. Причината е што нивната работа бара физичко присуство, човечка проценка и емоционална интеракција — нешта што технологијата сè уште не може да ги реплицира.
Иако извештајот покажува дека дигитализацијата и автоматизацијата радикално ќе го променат пазарот на трудот, експертите нагласуваат дека AI повеќе ќе го трансформира начинот на работа, отколку целосно да ја замени човековата улога. Како што забележува Мајкрософт, „вештачката интелигенција може да преземе задачи — но не и одговорност“.
Извор: N1info.rs
