Зошто американската влада продаде уметнички дела кои беа во сопственост на Леонардо Дикаприо?

На 5 септември 2025 година, американската влада продаде вредни уметнички дела од Жан-Мишел Баскија, Пабло Пикасо и Дајана Арбус, во рамки на обидите да се повратат над 4,5 милијарди долари што се верува дека биле проневерени од малезискиот финансиски магнат Џо Лоу – човекот зад една од најголемите финансиски афери на 21-от век.

Преку аукциската куќа Gaston & Sheehan, делото на Баскија „Автопортрет“ е продадено за 8,3 милиони долари, додека „Red Man One“ достигна цена од над 22 милиони долари. Делото на Пикасо од 1939 година, насловено „Tête de taureau et broc“, се продаде за 5 милиони долари, а фотографијата на Арбус – „Момче со играчка граната во Централ Парк, 1962“, за 500.150 долари.

Неколку од овие уметнички дела — вклучително и сликата на Пикасо и фотографијата на Арбус — претходно се наоѓале во приватната колекција на холивудската ѕвезда Леонардо Дикаприо. Но, тие не биле купени од него лично, туку му биле подарени од Џо Лоу – наводно со пари проневерени од државниот развоен фонд на Малезија (1MDB).

Фондот 1MDB, основан во 2009 година од тогашниот премиер Наџиб Разак, требаше да биде инструмент за економски развој. Наместо тоа, стана симбол на корупција: милијарди долари беа извлечени преку лажни инвестиции и луксузен живот на неколкумина поврзани со проектот.

Џо Лоу, кој бил ангажиран како консултант, набрзо стана познат по своите екстравагантни трошоци — купување луксузни недвижнини, јахти, уметнички дела, и дури и финансирање на филмот „Волкот од Вол Стрит“, во кој токму Леонардо Дикаприо ја игра главната улога на финансиски измамник.

Во 2014 година, Лоу му подарил на Дикаприо неколку дела од својата „колекција“ — вклучувајќи го и делото на Пикасо, заедно со роденденска честитка во која пишувало:

„Драг Леонардо Дикаприо, со задоцнување – среќен роденден! Овој подарок е за тебе.“

Но кога избувна аферата 1MDB, Дикаприо самоволно ги предаде делата на американските власти во 2017 година, откако дозна дека се купени со украдени пари. Неговите претставници потврдија дека тој немал никаква поврзаност со криминалот и целосно соработувал со истрагата.

До денес, Џо Лоу останува во бегство, со меѓународна потерница издадена од Интерпол. Американските власти досега успеале да повратат најмалку 1,7 милијарди долари преку конфискација и продажба на имот стекнат преку 1MDB, а оваа аукција е само дел од тој напор.

Сликите, иако некогаш симбол на луксуз и статус меѓу славните, сега се парче докази во најголемата финансиска истрага на 21-от век.