Skip to content
Целосната либерализација на поштенскиот пазар во Македонија повторно е одложена – овој пат до влезот на земјата во Европската унија. Во меѓувреме, Агенцијата за пошти побара од АД Пошта да воведе класификација на писмата и пратките за подобрување на услугите, а истовремено спроведе контроли кај приватните оператори поради пријави за нелојална конкуренција.
Либерализацијата на поштенскиот пазар, која требаше да стапи на сила на 1 јануари 2025 година и да стави крај на ценовниот монопол на АД Пошта, е одложена со измена на Законот за поштенските услуги. Според Агенцијата, ова значи дека државната компанија ќе го задржи монополот за поштенските пратки до 50 грама сè до членството на Македонија во ЕУ.
Паралелно, Агенцијата повторно побара од АД Пошта да воспостави јасна класификација на услугите според брзина и време на испорака. Ваквото барање е актуелно од 2022 година, но останува неисполнето. Регулаторот истакнува дека ова е особено важно поради слабите резултати во меѓународниот поштенски сообраќај – само 2,6% од писмата од увоз стигнуваат навреме, далеку од поставениот таргет од 75%.
Поради тоа, АД Пошта е задолжена веднаш да воведе категории како приоритетни и стандардни пратки, со јасни временски рамки, и да го извести регулаторот за преземените мерки.
Контроли кај приватните оператори
Агенцијата за пошти спроведе редовни и вонредни контроли кај двајца приватни оператори по пријави од АД Пошта за нелојална конкуренција. Државната компанија тврди дека овие оператори нелегално користеле меѓународни поштенски обрасци при испорака на пратки од странство.
Испитувањето покажа дека пратките пристигнуваат означени од унгарскиот национален оператор Magyar Posta, без можност за влијание од домашните приватни компании. Сепак, во интерес на примателите, Агенцијата задолжи еден од операторите да поставува дополнителни ознаки на пратките. Последователните контроли покажале дека овој проблем веќе не постои, а од септември 2024 година, друг оператор веќе не прима пратки со спорните UPU обрасци.
Агенцијата најави дека ќе продолжи со надзорот врз приватните поштенски оператори со цел да се обезбеди правична конкуренција и заштита на корисниците на поштенските услуги.
