Ангелов: Во ноември уште тројца пилоти ќе се обучуваат за ертрактори

Три авиони за гаснење пожари и тројца пилоти ќе бидат подготвени за оперативни интервенции во случај на пожари во претстојното лето, најави првиот човек на Дирекцијата за заштита и спасување (ДЗС), Стојанче Ангелов.

Дополнително, во ноември оваа година уште тројца пилоти ќе бидат испратени на обука за работа со овие воздухоплови. „Во наредниот период ќе се состанам внимателно со сите кандидати, се работи за искусни луѓе, и би рекол дека имаат потенцијал лесно да ја завршат обуката“, истакна Ангелов во интервју за ТВ Канал 5.

Интересот за позицијата пилот се зголемил поради повисоките плати во авиоодделението на ДЗС. „Кога дојдов на позицијата директор, побарав двојно зголемување на платата на сите вработени во авиоделението. Двојно е зголемена платата и на единствениот пилот на ертрактор, кој сега е изедначен со платите на пилотите на хеликоптери во полицијата и во армијата“, објасни Ангелов.

Во интервјуто, Ангелов се осврна и на законот за бранители, потенцирајќи дека отворањето на прашањето во моментов би било корист за ДУИ. „Наша цел е да не се дозволи да воскреснат криминогените структури. Затоа треба да бидеме внимателни во овој период. Секое посегнување по оваа тема носи политичка корист на ДУИ“, изјави Ангелов.

Тој додаде дека по завршување на локалните избори очекува значајно поместување во усвојувањето на законот, кој според него не е доволен бидејќи се однесува само на 15 семејства, и дека потребно е со него да бидат опфатени и неповредените бранители.