Skip to content
Активистот Бленди Ходаи остро реагираше на социјалните мрежи поради, како што вели, континуираната злоупотреба на јавниот дискурс од страна на Националната агенција за европски образовни програми и мобилност. Според него, институцијата која по својата природа треба да биде најблизок сојузник на младите и партнер на граѓанското општество, сѐ повеќе се оддалечува од тие вредности.
„Парадоксално е кога институција која треба да промовира европски вредности, секојдневно објавува видеа со популистичка реторика, каде граѓанското општество се прикажува како мафија, а активистите како лопови,“ напиша Ходаи.
Тој истакна дека доколку навистина постои сомнеж за злоупотреба на европски средства, институциите треба да реагираат низ правосудниот систем, а не преку, како што ги нарече, „видеа со лоша монтажа и уште полоша намера“.
Ходаи оцени дека станува збор не само за лична фрустрација, туку за директен удар врз демократските вредности и независноста на граѓанскиот сектор.
Бленди Ходаи е студент на Филозофскиот факултет, граѓански активист и директор на Форумот за образовни промени, кој изминативе години е активен на повеќе фронтови во граѓанскиот сектор.
