Чибишев: Сите пациенти кои беа испишани вчера ќе бидат под наша опсервација

Деветнаесетгодишниот Јован Костадинов, кој храбро спасил 21 лице во пожарот во дискотеката во Кочани, беше примен на Клиниката за токсикологија поради белодробни проблеми предизвикани од вдишување на зголемени концентрации на јаглероден моноксид. Тој беше отпуштен за домашно лекување вчера.

Директорот на Клиниката за токсикологија, Андон Чибишев, изјави дека Јован е во одлична здравствена состојба и дека се чувствува подобро.

„Си отиде дома нашиот херој,“ изјави Чибишев.

Тој додаде дека, иако Јован е во подобрена состојба, се препорачува да направи контрола во следните седум дена. Во наредните два до три месеци, сите пациенти кои беа отпуштени вчера, вклучувајќи Јован, ќе бидат под континуирана опсервација од Клиниката за токсикологија, за да се осигури дека нема да пропушти некои важни аспекти од здравственото следење.

Чибишев потврди дека Јован добро ја прифатил терапијата и е во значително подобрена општа клиничка состојба.

Денес, Јован беше пречекан со аплауз во гимназијата „Ванчо Прќе“ во Виница, а видео од неговиот пречек беше споделено на Фејсбук. Министерт за здравство, Арбен Таравари, исто така ја објави веста на својата Фејсбук страница.