Денес „Марш на ангелите“- „со љубов, со болка и со достоинство – во име на оние кои повеќе не се тука“

Во Кочани денеска ќе се одржи уште еден „Марш на Ангелите“ со почеток во 14:05 часот со повик „со љубов, со болка и со достоинство – во име на оние кои повеќе не се тука“.

Организаторите нагласуваат дека целта е да се насочи вниманието кон потребата од фер судски процес и да се потсетат луѓето дека зад секоја бројка стои вистински човечки живот, семејство и болка што не бледнее.

„Нашата мисија е јасна и искрена: за нашите деца, за вистинска правда, за Македонија со совест“, истакнуваат родителите. Родителите велат дека е важно да се покаже дека општеството не молчи пред неправдата и дека има луѓе што не се откажуваат од вистината.

На последниот „Марш на Ангелите“ во Скопјe, семејствата на жртвите изјавија дека знаат колку долг и тежок ќе биде патот до правдата. Сепак беше порачано дека доколку постои стремеж кон заедничката цел и се обединат, системот нема да има друг избор, освен да дејствува како што сака општеството.

Судењето за трагедијата во дискотеката „Пулс“ во Кочани, во која загинаа 63 лица, а околу 200 беа повредени, започна на 19 ноември. Во случајот се опфатени 38 обвинети – 35 лица и три компании. Следното рочиште е закажано за 2 декември.