Државните институции ќе плаќаат струја по цени од Македонската берза за електрична енергија

Во договор меѓу Министерството за енергетика, рударство и минерални суровини, Бирото за јавни набавки и Националниот оператор на пазар на електрична енергија (МЕМО), сите државни институции наскоро ќе плаќаат струја по цените постигнати на Македонската берза за електрична енергија. Со оваа одлука, цената од унгарската берза ХУПЕКС повеќе нема да биде референтна, што претставува значаен чекор за раст и развој на домашниот енергетски пазар.

Министерката за енергетика, Сања Божиновска, нагласи дека со овој потег се создаваат услови за стандардизација на техничките спецификации за сите идни јавни набавки на електрична енергија.

„Важно е институциите и компаниите при јавната набавка на електрична енергија да применуваат стандардни тендерски правила, со кои договорите за снабдување ќе се темелат на податоците од македонската берза. Ова не само што обезбедува фер и конкурентни цени, туку и ја зајакнува енергетската независност на земјата“, изјави Божиновска.

Директорот на МЕМО, Зоран Ѓорѓиевски, истакна дека домашната берза обезбедува сигурност и релевантни цени за секој час од денот, а со оваа одлука нејзината ликвидност значително ќе се зголеми.

„Ова ќе ја направи берзата порелевантна за трговците и снабдувачите, ќе ја зголеми понудата и длабочината на пазарот, а на долг рок ќе влијае и врз цените на електричната енергија“, рече Ѓорѓиевски.

Со овој потег, стотина државни институции кои плаќаат десетици милиони евра годишно за струја ќе ја користат цената формирана на македонскиот пазар, што ќе придонесе за зголемување на интересот од домашните и странските учесници. Дополнително, ова ќе биде важен предуслов за идно поврзување на Македонската берза со енергетските берзи од соседните држави и воведување на еврото како валута за тргување.

Македонската берза за електрична енергија започна со работа во мај 2023 година и бележи значаен раст во истргуваните количества и бројот на активни учесници. Тргувањето се одвива според моделот „ден однапред“, што значи дека електричната енергија се закупува еден ден пред испораката, а берзата е гарант за реализацијата на договорите.