Два земјотреса во Косово почувствувани и во делови од Северна Македонија

Ноќеска беа регистрирани два земјотреса во Косово, кои, според сведоштва на граѓаните на социјалните мрежи, се почувствувале и во северниот дел на Северна Македонија, особено во Тетово, Гостивар и Скопје.

Според Европскиот медитерански сеизмолошки центар (ЕМСЦ), првиот земјотрес со јачина од 4 степени според Рихтеровата скала се случил во 1:46 часот по локално време. Епицентарот бил на 16 километри од Призрен, на длабочина од 10 километри, и на околу 74 километри западно од Скопје.

Вториот земјотрес, со јачина од 3,2 степени, е регистриран во 3:59 часот. Епицентарот се наоѓал на 19 километри од Призрен и 7 километри од Драгаш, на длабочина од 11 километри.

Иако земјотресите биле со умерена јачина, граѓаните во регионот на Тетово, Гостивар и Скопје ги почувствувале потресите, што предизвика голем интерес и коментари на социјалните мрежи. Засега нема информации за причинета материјална штета или повредени лица.