Една третина од работниците во Македонија земаат плата под 30 илјади денари

Податоците на Управата за јавни приходи откриваат дека 167 илјади работници, или една третина од вкупно 510 илјади, примаат плата пониска од 30 илјади денари. Дури 75% од вработените земаат примања под просечната плата, која во јуни изнесувала 45.468 денари.

Иако просечната плата бележи континуиран раст, синдикатите укажуваат дека таа не е реален показател на животниот стандард, бидејќи растот најмногу се должи на високите плати на менаџерите.

Претседателот на ССМ, Слободан Трендафилов, предупредува дека одбивањето на зголемување на минималната плата директно ги оштетува над 167 илјади работници и нивните семејства, кои со две минимални плати не можат да ја покријат синдикалната потрошувачка кошница.

Ангел Димитров од Организацијата на работодавачи смета дека државата мора да воведе пофер даночна политика преку прогресивно оданочување, со повисоки стапки за приходите од капитал и повисоките плати.

Најплатени сектори остануваат информациските технологии, финансиските услуги и рударството.