Филипче: Граѓаните во Скопје се гушат, Мицкоски вели им се причинува [Видео]

Граѓаните во Скопје се гушат, Мицкоски вели им се причинува. Како скандалозна ја оценува изјавата на премиерот Мицкоски за загадувањето на воздухот деновиве, претседателот на СДСМ Венко Филипче. Тој посочува дека ниту една влада досега не се однесувала со проблемите на граѓаните така како што сега се однесува владата на ВМРО ДПМНЕ.

„После 10 дена пожар во Вардариште,неколку дена пожар во Дрисла, граѓаните практично се гушат,скандалозна е изјавата на премиерот дека можеби изгледа загадено, но нема доволна количина на честички, кога луѓето знаат како дишеа синоќа, вчера пред два дена. Таквиот став на власта таквата изјава на премиерот во најмала рака е непочитување на граѓаните “, рече Филипче.

Тој додаде дека сериозно е загрозено здравјето на граѓаните во цело Скопје посебно во населбите околу Дрисла и Вардариште.

„ Мајките во Аеродром и околните населби ги прибираа децата дома вклучуваат прочистувачи за воздух а власта не прави ништо. Едно е да грешиш во политиката друго е да немаш капацитет,но да ги игнорираш проблемите како што тоа го прави на секоја тема власта, е нешто што е скандалозно и досега ниту една влада ма Македонија не се однесувала вака со проблемите на граѓаните со секојдневните проблеми на граѓаните“, рече претседателот на СДСМ, Венко Филипче.