Skip to content
Сите граѓани ќе добијат акции во државните компании што успешно работат, предвидува новиот мастер план на СДСМ што го најави партискиот претседател Венко Филипче. Според него, со оваа мерка треба да се исправи неправдата од приватизацијата, а програмата предвидува и прогресивен данок, финансиска поддршка за граѓаните и засилена борба против корупцијата.
Во гостувањето на телевизијата Алсат, Филипче изјави дека партијата подготвува економски и социјални мерки што ќе бидат дел од нејзината понуда за следните парламентарни избори.
„Конечно, сите граѓани акционери на државните компании кои добро работат“, изјави Филипче, наведувајќи ја Лотарија на Македонија како една од компаниите во кои би се применувал предложениот модел.
„Сите граѓани ќе добијат акции. Се исправува неправдата од времето на приватизацијата“, рече претседателот на СДСМ.
Филипче најави дека мастер планот дополнително ќе биде претставен пред јавноста, со детали за предложените мерки и начинот на нивното финансирање. Засега не прецизираше колкав удел би добил секој граѓанин, кои компании би биле опфатени и како би се спровела распределбата на акциите.
Друга клучна мерка во програмата е воведувањето прогресивен данок, кој според Филипче треба да придонесе за поправедна распределба на доходот и капиталот.
Тој најави и пакет финансиска помош за различни категории граѓани, со образложение дека за секоја мерка ќе биде утврден конкретен извор на средства.
Во делот на борбата против корупцијата, Филипче најави ветинг на поранешните функционери и соработка со Европското јавно обвинителство. Европската интеграција на Македонија, според него, останува еден од основните приоритети на партиската програма.
Претседателот на СДСМ рече дека предложените политики произлегуваат од програмската платформа усвоена на партискиот конгрес и дека јавноста ќе биде запознаена со нив пред следните парламентарни избори, без оглед дали ќе бидат редовни или предвремени.
Тој порача дека СДСМ ќе бара поддршка од граѓаните за спроведување на најавените економски, социјални и антикорупциски мерки.
