Филипче: „Пензискиот систем е доведен до колапс – Владата на Мицкоски ја крие вистината од граѓаните“

Претседателот на СДСМ, Венко Филипче, денеска на прес-конференција упати остри критики и сериозни предупредувања дека пензискиот систем се наоѓа во состојба на длабока финансиска нестабилност, која, според него, е директно предизвикана од „лошите, непромислени и манипулативни политики“ на Владата предводена од ВМРО-ДПМНЕ и коалицијата ВЛЕН.

Филипче ја започна прес-конференцијата со силна осуда на, како што рече, „невидената хајка од лаги и манипулации“ што доаѓаат од власта:
„Сведоци сме на една хајка, на бесрамни лаги и манипулации, голем дел дури и од премиерот. Такво политичко лицемерие досега не сме виделе. Обидот премиерот да ја препише кризата што самиот ја создаде и измамата кон пензионерите на СДСМ е нечист потег без преседан“, порача тој.

„Хаосот во пензискиот фонд е нивно дело, не наше“

Во продолжение, Филипче нагласи дека власта последниве денови се обидува да ја префрли вината врз СДСМ, злоупотребувајќи го судството и пласирајќи невистини дека наводно СДСМ сакал да ги намали пензиите:
„Ваква лага одамна не сме слушнале. Сакам јасно да им порачам на пензионерите: хаосот во пензискиот систем, неизвесноста околу зголемувањето на пензиите, па дури и ризикот од редовна исплата на пензии, е резултат на лошите политики, лагите и манипулациите на премиерот и Владата на ВМРО-ДПМНЕ, ЗНАМ и ВЛЕН.“

Според него, владините кампањски ветувања и популистички мерки го донеле системот „до работ на одржливост“, со што е доведена во прашање иднината на речиси сите сегашни и идни пензионери.

Филипче: „Нашиот модел беше стабилен – нивниот е противуставен и опасен“

Лидерот на СДСМ потсети дека за време на нивното владеење бил воспоставен систем на усогласување на пензиите со 50% инфлација и 50% раст на платите, модел што, според него, обезбедувал стабилно и предвидливо зголемување.
„Доколку продолжеше овој систем, над 92 проценти од пензионерите денес ќе добиеја поголемо зголемување од овие 1.000 денари што ги нуди владата на Христијан Мицкоски,“ истакна Филипче, додавајќи дека новото решение донесено од Владата е несоодветно и многу веројатно противуставно, според последните сигнали од Уставниот суд.

„Дупка од една милијарда евра – се враќаме во 2017 година“

Филипче обелодени и податоци кои укажуваат дека финансиската состојба на ПИОМ драматично се влошила во последната година ипол:
„Дупката во ПИОМ изнесува една милијарда евра. Се враќаме на системот што го затекнавме во 2017 година, кога ПИОМ беше во минус од 48%. Со нашите политики го намаливме тој минус на 32% и имавме план, заедно со Светска банка, да продолжиме со стабилизација. Но денес, состојбата е полоша од кога било.“

Тој додаде дека ако во 2023 година за функционирање на фондот биле потребни 29 милијарди денари, за 2026 година се предвидуваат дури 62 милијарди:
„Повеќе од половина од вкупната сума за пензии се покрива со субвенции од државата, бидејќи фондот ги нема тие пари. Се поставува прашањето: што ако утре државата не може да ги покрие тие 50 проценти? Што тогаш со пензиите? Што со идните пензионери?“

„Унгарскиот кредит – загадочен, сомнителен и потрошен“

Филипче остро ја критикуваше и владината политика за задолжување, посочувајќи дека „фамозниот унгарски кредит“ не бил употребен за капитални инвестиции, ниту за поддршка на компании и општини:
„Тие пари, со сомнително потекло, се потрошени за кампањски политики. Во буџетот ги нема, а фондот е празен. Дополнително, ПИОМ должи и кон Фондот за здравство и кон приватни здравствени установи, што никој од власта не го споменува.“

Недозволива дискриминација – 12.000 пензионери од дијаспората без право на пензија

Филипче укажа и на нов сериозен проблем: над 12.000 пензионери кои живеат во странство биле исклучени од правото на пензија само поради тоа што не живеат во државата.
„Комисијата за заштита од дискриминација веќе донесе одлука. Тоа значи нови тужби и дополнителни трошоци за државата.“

„Премиере, престанете со лагите – сопствениот хаос не можете да го скриете“

На крајот од прес-конференцијата, Филипче испрати директна порака до премиерот и Владата:
„Престанете да напаѓате. Се препелкате во сопствената кал. Хаосот е резултат на вашата неспособност и немањето капацитет да ја водите државата. Од каде ќе кратите за да ги исплатите пензиите? Каде се парите на работниците кои секој месец го полнат фондот?“

Филипче предупреди дека, доколку веднаш не се преземат системски решенија, земјата може да се соочи со ризик од нередовни исплати на пензии, уште поголеми фискални дупки и сериозно нарушена доверба во државните институции.