Skip to content
„Социјалдемократскиот сојуз на Македонија нема да гласа за ваков буџет. Затоа, како одговорна опозиција поднесовме повеќе од 200 амандмани. Нудиме конкретни решенија за подобрување на клучните фискални политики“ рече претседателот на СДСМ, Венко Филипче на прес-конференција.
Тој додаде дека неговата партија предлага зголемување на платите во јавниот сектор, особено во образованието, полицијата и на пожарникарите.
„Конкретно, во Министерството за внатрешни работи предлагаме покачување на платите за 20%, како и распределба на пари за набавка на напредни технолошки средства за зголемување на безбедноста на граѓаните“ рече Филипче.
Претседателот на СДСМ додаде дека амандманите кои ги поднеле, а кои се однесуваат на буџетот за Министерството за здравство, имаат цел значително да ја подобрат медицинската инфраструктура и услугите, а вклучуваат набавка на нова медицинската опрема, зајакнување на капацитетите на Итната медицинска помош, едукација и доусовршување на лекари и медицински персонал.
„Амандманите што ги предлагаме во делот на буџетот што се однесува на областите енергетика и животната средина имаат за цел да поттикнат еколошки и одржлив развој преку подобрување на енергетската инфраструктура и енергетската ефикасност, како и намалување на загадувањето“ рече Филипче.
