Skip to content
Градоначалникот на Општина Центар, Горан Герасимовски, изјави дека целосно го поддржува протестот поврзан со работата на УСЈЕ и порача дека, доколку наводите за загадување се потврдат, мора да следуваат ригорозни санкции. Изјавата ја даде во гостување во Дневникот на телевизија Сител.
„Ако тоа што се зборува е вистина, мора да има строги последици. Контролите треба да бидат постојани и да не се однесуваат само на еден објект, туку на сите фабрики“, нагласи Герасимовски.
Како потпретседател на ЗЕЛС, тој изрази очекување Град Скопје да изработи јасна стратегија и акциски план во кои ќе бидат вклучени сите десет скопски општини, со цел системско намалување на аерозагадувањето.
Според најавите, до крајот на годинава, односно најдоцна до средината на следната недела, во рамки на ЗЕЛС ќе се одржи состанок со претставници на сите општини, на кој приоритетна тема ќе биде загадениот воздух.
Герасимовски посочи дека се неопходни конкретни мерки: функционален и ефикасен јавен и сообраќаен превоз, воведување ограничувања при екстремно загадување, како системот „пар-непар“, засилени инспекциски контроли, како и проверки кај домаќинствата што користат штетни горива. Дополнително, побара редовен надзор во индустриските зони и кај најголемите загадувачи.
Иако Општина Центар нема индустриска зона, градоначалникот нагласи дека загадувањето не познава административни граници и дека сите делови на Скопје се подеднакво погодени.
Во однос на можната дислокација на цементарницата УСЈЕ, Герасимовски оцени дека процесот нема да биде едноставен, но порача дека „кога има волја, има и решение“.