Градоначалникот на Барселона планира укинување на директното изнајмување станови на туристи

Властите во Барселона планираат да го ограничат или целосно да го укинат директното изнајмување станови на туристи до крајот на 2028 година. Градоначалникот Жауме Колбони го опиша овој потег како драстичен, но неопходен за справување со растечките трошоци за домување.

„Ситуацијата е многу тешка. Во Барселона, како и во многу европски градови, најголемиот проблем е просторот за домување. Последната деценија, цените за изнајмување во градот се зголемија за 68%, а трошоците за купување куќа пораснаа за 38%,” изјави Колбони.

Во фокусот на иницијативата е „Лиценцата 10.101,“ која овозможува туристичко сместување преку платформи како Airbnb. Колбони обвини дека масовниот туризам го загрозува правото на домување, бидејќи становите се користат за повисока заработка наместо за локалните жители.

Според планот, Барселона нема да обнови ниту една од тековните лиценци по нивното истекување во 2028 година, што треба да врати над 10.000 станови на пазарот за домување. Меѓутоа, мандатот на Колбони завршува во 2027 година, па судбината на оваа иницијатива зависи од следната локална власт.

Од друга страна, организацијата „Апартур,“ која ги застапува компаниите за управување со просторот и сопствениците, го нарече планот „тајна присилна експропријација“ и најави тужба за изгубени приходи и инвестиции. Уставниот суд ќе ја разгледа легалноста на мерката.