И Перински и Ѓорѓиевски ќе го сределе Скопје, ама не сега туку ако станат градоначалници

И министерот за локална самоуправа, Златко Перински, и градоначалникот на Кисела Вода, Орце Ѓорѓиевски, се гледаат како можни идни лидери на Скопје. Двајцата ја потврдуваат својата подготвеност за оваа функција, но конечниот збор ќе го има партијата ВМРО-ДПМНЕ.

Во последното телевизиско гостување, Орце Ѓорѓиевски изјави дека добива поддршка од граѓаните, но напомена дека конечната одлука ќе биде резултат на партиски анкети. „Граѓаните гледаат во мене човек што може да го среди хаосот во Скопје. Убеден сум дека за кратко време би можел да донесам позитивни промени,“ изјави тој.

Тој додаде дека досегашното искуство како градоначалник на Кисела Вода покажало дека нема нерешливи проблеми. „Повеќедецениските проблеми во мојата општина се минато, а со добар тим истото можам да го направам и за Скопје,“ истакна Ѓорѓиевски, додавајќи дека сериозно би пристапил кон функцијата ако биде избран.

Златко Перински, пак, се залага за системски пристап во ревитализацијата на главниот град. „Скопје се уништува системски и само така може да се обнови. Со добро менаџирање и стратешки решенија, можеме да направиме вистинска разлика,“ рече Перински, истакнувајќи дека нема да дозволи внатрепартиска битка.

Перински ја охрабри конкуренцијата внатре во партијата, нагласувајќи дека тоа ќе стимулира квалитет. „На крајот, ВМРО-ДПМНЕ, врз основа на анкети и задоволството на граѓаните, ќе ја донесе најдобрата одлука,“ додаде тој.

Со амбициозни кандидати како Ѓорѓиевски и Перински, трката за кандидатурата за градоначалник на Скопје добива нова димензија, а партијата и граѓаните ќе имаат клучна улога во изборот.