ИЈЗ предупредува: Лицата над 65 години во висок ризик од жештините – еве како да се заштитат

Институтот за јавно здравје утрово излезе со детални препораки за заштита на населението над 65-годишна возраст, откако синоптичарите најавија температури до 41 °C. Стручњаците потсетуваат дека постарите лица потешко се прилагодуваат на екстремна жештина, често се со хронични болести и земаат терапија што ја менува природната реакција на организмот на топлина – поради што спаѓаат во таканаречената ризична категорија.

Институтот апелира во периодот од 11 до 17 часот да се избегнува директно сонце и физичка работа на отворено. Се препорачува лесна, светла и памучна облека, очила за сонце, капа со широк обод и крем со УВ-заштита најмалку 30. Наместо да се чека чувство на жед, потребно е редовно внесување течности, а алкохолот, кофеинот и екстремно ладните пијалаци треба да се избегнуваат. Доколку лекарот веќе одредил ограничувања за пиење течности, стриктно да се почитуваат неговите упатства.

Од 11 до 17 часот се советува и минимизирање на употребата на шпорет и рерна, за да не се зголемува температурата во домот. Хронично болните – особено со срцеви, невролошки или белодробни заболувања – се повикуваат да ја земаат редовната терапија без прекин и при каква било промена во здравствената состојба веднаш да се консултираат со матичниот лекар.

Институтот потсетува дека информираноста е клучна: роднини, соседи и пријатели треба да ги знаат препораките и да им помогнат на повозрасните да ги применат. Прогнозата на УХМР за претстојните денови вели дека времето ќе биде сончево и исклучително топло, па навремените и дисциплинирани мерки може да спасат живот.