„Исчезнување 72 часа“, „Голтање прашок за перење“ – Летечкиот супермен не единствениот опасен предизвик на ТикТок

Новата ТикТок сензација, позната како „Летечки Супермен“, е предизвик кој брзо го освојува внимание кај младите не само во Македонија туку во Регионот, но и во светот. Од опасната игра која што во изминативе денови се прошири во скопски и други училиште во земјава се повредија 11 ученици. Министерката за образование вчера ги повика средношколците да се насочат на натпревари во образованието и науката. Психолозите, пак, укажуваат дека прво треба да се дознае кој е мотивот на младите да се изложуваат на ваквите опасности.

На прв поглед, изгледа како забавен и невинен начин за собирање следбеници на оваа популарна социјална мрежа, но реалноста е многу поопасна. Овој предизвик вклучува пет учесници, четворица од нив се држат за раце и формираат стабилна основа, додека петтиот учесник трча и скока во нивните раце, правејќи да изгледа како да лета. Но, ако координацијата меѓу учесниците не е совршена, последиците можат да бидат сериозни и понекогаш смртоносни.

Опасностите од овој предизвик не се само теоретски. Во едно училиште во Србија, девојче било повредено додека учествувала во предизвикот, а повредите биле снимени со мобилен телефон. Дополнително, медиумите во Романија известуваат дека во една детска болница во Букурешт биле згрижени повеќе од 20 деца повредени во овој предизвик за само еден ден. Повредите можат да бидат сериозни, вклучувајќи скршеници, па дури и опасност од трајна инвалидност, ако изведувачите не ја извршат својата задача со точна координација.

„Летечкиот Супермен“ не е единствениот опасен предизвик што се шири на социјалните мрежи. Други предизвици како што се „Исчезнување 72 часа“, „Голтање прашок за перење“ или „Трчање по автопат“ исто така носат сериозни ризици за здравјето на младите. Родителите, свесни за овие опасности, апелираат за поголема контрола и мерки за заштита на своите деца од овие ризични игри кои се популарни на платформите како ТикТок.

Во овој контекст, психолозите истакнуваат дека иако социјалните мрежи можат да имаат позитивни аспекти кога се користат умерено, треба да се има на ум дека не сè што е прикажано на интернет е безбедно или реално. Социјалните мрежи можат да создадат перцепција на нереални очекувања, особено кога се работи за млади лица кои се подложни на влијанието на интернет културата и влијанието на популарни влијатели.

Со цел да се заштитат децата, Австралија беше првата земја која усвои закон со кој се забранува користењето на социјални мрежи за деца под 16 години. Овој закон, кој треба да стапи на сила во ноември 2025 година, ќе постави строги контроли за проверка на возраста и ќе обврзе социјалните мрежи да се осигураат дека нивните корисници се вистински во однос на нивната возраст. Оваа иницијатива е пример за други земји да ги следат и воведат слични мерки со цел да се заштитат младите од опасностите кои произлегуваат од неконтролираната употреба на социјалните мрежи.

Родителите имаат важна улога во едукацијата на своите деца за опасностите кои ги носат ваквите предизвици и треба постојано да ги потсетуваат дека не сè што е популарно на интернет е безбедно за нив. Внимателноста и контрола во користењето на социјалните мрежи може да спречат непотребни повреди и трагедии.