Касале: Национализмот и авторитаризмот одат рамо до рамо и водат кон војни

„Сакам Северна Македонија да биде поблиску до ЕУ, и затоа ми е драго што ме поканивте да учествувам во разговорите. Национализмот и авторитаризмот одат рамо до рамо и водат кон војни, треба да размислиме околу тоа. Како европеец, знам дека Европа е мировен проект, го памтат падот на Ѕидот на Берлин, и не е наивно да се верува дека се можни големи промени“, рече Роџер Касале од Нов Европски народен форум- Италија, кој се осврна на подемот на десничарски партии низ Европа.

Како еден од говорниците на вториот панел под наслов „Подемот на крајно десничарскиот национализам“ на меѓународната конференција „Одбрана на демократијата и човековите права“,

Касале рече дека „политичката клима се менува, доаѓа голема бура. Бура по бура којашто не очекува. Видовме во Британија, со растот на десничарскиот популизам, кој ја истурка Британија од Европската Унија, имавме најлоша повоена влада досега, онаа на Борис Џонсон… Само сакав да споделам неколку наоди“.

„Не смееме да имаме заблуди. Сметам дека десничарите сакаат да поларизираат, и на тој начин доаѓаат на власт“, посочи меѓу другото во своето обраќање Касале.

Роџер Касале, поранешен британски пратеник, е ко-основач на Новиот европски народен форум, кој промовира инклузивна европска демократија. Добитник е на награди за одбрана на правата на граѓаните на ЕУ по Брегзит, вклучувајќи ја и наградата „Фајненшл тајмс“ за иднината на Британија.

Меѓународната конференција „Одбрана на демократијата и човековите права“ во Скопје е дел од програмата на Неделата на човекови права – иницијатива на Владата на Северна Рајна-Вестфалија.