Skip to content
Предлогот на Владата за разрешување на државниот јавен обвинител Љупчо Коцевски се очекува да се најде на дневен ред на утрешната пленарна седница на Собранието, закажана за 16 декември 2025. Претседателот на Собранието Африм Гаши, на денешен брифинг со новинарите, рече дека Коцевски сè уште нема добиено покана да се обрати пред пратениците, но оти таа треба да му биде доставена во текот на денот.
Отворањето на оваа точка практично ја враќа во прв план институционалната конфронтација меѓу извршната власт и првиот човек на Обвинителството. Владата го усвои предлогот на седница на 9 декември и најави дека документот ќе го достави во Собранието, а во меѓувреме повеќе медиуми објавија дека предлогот веќе пристигнал во законодавниот дом.
Во образложенијата што деновиве циркулираат во јавноста, Владата се повикува на член 88 став 1 од Законот за јавното обвинителство и на претходно мислење од Советот на јавни обвинители. Како клучни причини се наведуваат „крупни професионални грешки“ во раководењето, „неовластено изнесување информации и податоци за судски предмети“ и „нарушување на угледот“ на Обвинителството и личниот углед на Коцевски, со теза дека ваквите постапки ја нарушиле ефикасноста и функционалноста на институцијата.
Коцевски, пак, тврди дека станува збор за политичка одлука. Тој потсетува дека, според важечката рамка, за разрешување би требало да постои тешка дисциплинска повреда, а дека Советот на јавни обвинители веќе констатирал оти таква повреда не е утврдена. Во април годинава Советот даде негативно мислење за предлогот за негово разрешување, при што од девет члена тројца гласаа „за“, а шест „против“.
Случајот веќе имаше и силна политичка димензија: во јули Собранието ја прифати интерпелацијата за работата на Коцевски, но интерпелацијата, по својата природа, не носи автоматски правен ефект за разрешување. Сега, со владин предлог што треба да се разгледува на пленарна седница, тежиштето се префрла на формалната постапка што може да заврши со гласање за разрешување.
Гаши денеска најави дека доколку дојде до разрешување, изборот на нов државен јавен обвинител би се спровел во рамки на законските рокови. Во истиот брифинг тој информираше дека до крајот на декември се планирани уште четири пленарни седници, меѓу кои и годишното обраќање на претседателката Гордана Сиљановска-Давкова на 23 декември, како и седница за пратенички прашања на 25 декември. Гаши додаде и дека најавените резолуции за мигрантите од СДСМ и ВМРО-ДПМНЕ сè уште не се доставени во Собранието.