Skip to content
Ако премиерот знае дека ништо нема да се случи, затоа што процедурата како што вели, може да трае со години, се поставува дилемата како 11 декември стана „историски ден“ што ќе ја стресе Македонија безбедносно и меѓуетнички.
Љубиша НИКОЛОВСКИ
Ех да беше само овој закон, лесно ќе беше. Сѐ се случи многу одамна, пред пет години кога ….., а можеби и многу порано!
Но сега како сѐ да почна со образложението на Уставниот суд дека „Со Законот за јазиците политиката создаде своевиден правен хаос, кој резултира со политички хаос, недоверба и дилеми. Уставниот суд е на потег, не за мудра, туку да донесе уставно-правно втемелена и аргументирана одлука“, изјави претседателот на судот Костадиновски.
Е, ајде, де!
И политичката лавина тргна како продолжение на претходната одлука на Уставниот суд да го „среди хаосот“ со балансерот.
Така Уставниот суд наместо „еквилајзер“ на правно-политичката сфера, во која се лизга Македонија од осамостојувањето наваму, како низ слалом меѓу политичкото и правното, највисокиот Суд се впушти во расчистување на „ланскиот снег“ и со правни средства да „рине“ политички мраз, „ничим изазван“!
Ако претседателот на Уставниот суд „не е сигурен што ќе се случи со иницијативата за отворање на иницијативите за оспорување на Законот за јазиците“, тогаш зошто воопшто по пет „мирни“ години овој Уставен суд се најде во ситуација да ги става на дневен ред.
Ако доплнително на тоа и премиерот знае дека ништо нема да се случи, затоа што процедурата како што вели, може да трае со години, се поставува дилемата како 11 декември стана „историски ден“ што ќе ја стресе Македонија безбедносно и меѓуетнички.
Ако и ДУИ го знае сето ова, зошто раководството и симпатизерите се мрзнат пред зградата на Уставен суд за да докажат дека ништо нема да се случи?
Но, ВМРО ДПМНЕ кога веќе знае дека ништо нема да се случи, затоа што ако се случи, нивниот коалоциски партнер „ќе ја отвори пандорината кутија“, зошто Игор Јанушев како подносител и цело ВМРО ДПМНЕ не ја повлечат иницијативата за оспорување на уставноста на Законот?
Така сите ќе си одат дома и Македонија ќе продолжи да си го плете секојдневието како и досега мирно и спокојно и сѐ ќе биде под контрола како што со сигурност не уверува премиерот Мицкоски.
