Skip to content
Државниот санитарен и здравствен инспекторат (ДСЗИ) соопшти дека располага со целосна медицинска документација поврзана со смртта на новороденче од Арачиново, кое почина на Клиниката за гинекологија и акушерство во Скопје на 1 октомври. Во документите како причини за смрт се наведуваат колабирано белодробно крило, тешко нарушување на дишењето, едем на мозокот и кардиореспираторна инсуфициенција.
Од ДСЗИ информираат дека до Министерството за здравство е доставена иницијатива за формирање стручна комисија, која ќе треба да утврди дали во лекувањето на новороденчето имало евентуални медицински пропусти. По налог на министерот, во меѓувреме бил спроведен и вонреден инспекциски надзор на Клиниката.
Хронологија на настаните според медицинската документација
Според медицинските записи, родилката В. И. на 27 септември била примена на Клиниката како итен случај и хоспитализирана на Одделот за патолошка и високоризична бременост. На 28 септември било донесено решение породувањето да се изврши со царски рез, кој бил реализиран во вечерните часови. Родено било живо машко новороденче во 36. гестациска недела.
Неколку часа по раѓањето, на 29 септември, новороденчето било префрлено на Одделот за интензивна нега поради средно тежок респираторен дистрес. Рендгенската снимка покажала парцијален пнеумоторакс на левото белодробно крило. Детето било седирано, интубирано и поставено на апарат за вештачка вентилација, а поради сомнение за конгенитална сепса била започната тројна антибиотска терапија. Во лекувањето бил вклучен и детски хирург, кој препорачал конзервативен пристап.
Во текот на истиот ден, според документацијата, новороденчето било двапати реинтубирано поради спонтано вадење на интубациската цевка.
Нагло влошување и смртен исход
На 1 октомври здравствената состојба на детето нагло се влошила. Биле повикани детски кардиолог и детски хирург, при што поради масивен пнеумоторакс на десното белодробно крило бил поставен дрен. Истовремено, ултразвучниот преглед покажал присуство на едем на мозокот.
И покрај преземените медицински мерки и спроведената кардиопулмонална реанимација, при која адреналин бил аплициран трипати, состојбата не се стабилизирала. Смртта била констатирана во 19 часот на 1 октомври.
Побарана обдукција, истрагите продолжуваат
Како официјални причини за смртта во документацијата се наведуваат масивен пнеумоторакс, белодробен емфизем, едем на мозокот и кардиореспираторна инсуфициенција. Побарана е обдукција од Институтот за патологија при Медицинскиот факултет во Скопје, но извештајот сè уште не е доставен.
Родилката била испишана од Клиниката на 1 октомври по сопствено барање, спротивно на препораките на лекарите. Во меѓувреме, на Клиниката заседавала и Комисијата за следење и унапредување на квалитетот на здравствената заштита, на 14 и 28 октомври, согласно утврдените процедури.
Стручната комисија треба да даде конечна оценка дали медицинското постапување било во согласност со важечките стандарди. Родителите најавија тужба против Клиниката, додека случајот е предмет и на истрага од страна на Јавното обвинителство. Во јавноста претходно се појавија и изјави од две специјализантки кои, во рамки на интерна постапка, укажале на наводно несоодветно лекување на интензивната нега.