Колку заработува Зеленски?

Украинскиот претседател Володимир Зеленски објави декларација за имотот, приходите, трошоците и финансиските обврски на неговото семејство за 2024 година.

Системот за задолжителни електронски изјави за имот на јавни службеници беше воведен во 2014 година како дел од напорите на Украина за борба против корупцијата. По неговото суспендирање на почетокот на војната, Зеленски во октомври 2023 година потпиша закон со кој повторно се врати обврската за поднесување декларации, пишува „Киев Индипендент“.

Според најновите податоци, вкупниот приход на семејството Зеленски во 2024 година изнесувал 15.286.193 гривни (368.556 долари). Од оваа сума, 8.585.532 гривни (207.000 долари) потекнуваат од продажба на државни обврзници, додека останатиот дел се состои од претседателската плата, банкарските камати и приходите од издавање недвижен имот.

„Зголемувањето на приходите на семејството на претседателот на Украина во однос на претходната година се должи на продолжената исплата на киријата“, соопшти прес-службата на Зеленски.

Во извештајот се посочува дека во 2024 година немало значајни промени во имотот, недвижностите или возилата што ги поседува семејството Зеленски.

За споредба, Зеленски и членовите на неговото семејство во 2023 година пријавиле приход од 316.700 долари, што покажува раст на приходите во 2024 година.