Skip to content
„Со огромно жалење морам да констатирам дека оваа Влада предводена од ВМРО ДПМНЕ граѓаните ги дели на свои и туѓи. Очигледно душманскиот пристап со Струмица и струмичани расте и се интензивира веројатно од некаква нивна помисла дека на тој начин ќе можат да ќарат некакви политички поени, но реалноста е сосема друга“, истакна денеска на прес конференција на градоначалникот на Струмица Костадин Костадинов.
Тој се обрати од пред школскиот затворен базен којшто веќе требаше да биде изграден во Струмица, почнат од претходната Влада кој сега е обраснат со трева и нема никакви активности.
„Инаетот оди до таму да власта од ВМРО ДПМНЕ дури нема чувство за грижа кон дечињата во Струмица коишто овде треба да имаат часови по пливање“, нагласи градоначалникот на Струмица.
Тој изрази жалење што локалните авторитети, пратеници од ВМРО ДПМНЕ не преземаат ништо во однос на свесно закочените проекти во општина Струмица.
„Не е само затворениот базен. Таков пример имаме и со регионалниот пат А4 Струмица – Дабиле каде што веќе дефинитивно ни стана јасно дека свесно ги кочат експропријациите со што не можат ниту нашиот изведувач, ниту изведувачот на ЈПДП, ниту ЕВН да влезат и да си ја завршат работата за проекти за кои ние сакаме да ги реализираме“, посочи Костадинов.
Од прес конференцијата порача:
„Да не излезе дека само се жалиме и ја кудиме власта на ВМРО ДПМНЕ, очигледна е неспособноста и очигледен е инаетот којшто го водат со Струмица, еве денеска давам предлог нека се откажат од проектот за затворен базен и нека не остават мене, мојот тим, и Советот на општина Струмица да го завршиме овој важен проект за граѓаните и граѓанките на општина Струмица“.
